बालविवाह न्यूनीकरण तथा अन्त्यके माग
पहुरा समाचारदाता
धनगढी, २५ चैत । सुदूरपश्चिम प्रदेशहे बालविवाह मुक्त प्रदेश बनैना साझा संकल्पके साथ बुधके रोज एक महत्वपूर्ण पहल सम्पन्न हुइल बा ।
बालबालिका ओ युवाके अधिकार स्थापनाके लाग निरन्तर क्रियाशील संस्था जि एन बि नेपाल, युवालय, भिजनरी भ्वाईस नेपाल, सामाजिक विकासको लागि सचेत समाज ओ जि एन बि ग्लोबल—के प्रतिनिधिहुकनके संयुक्त उपस्थितिमे सुदूरपश्चिम प्रदेश सभाके सामाजिक विकास समितिके सभापति माननीय धर्मराज पाठकहे बालविवाह न्यूनीकरण तथा अन्त्यके लाग तयार करल विस्तृत अनुरोध पत्र हस्तान्तरण कैगिल बा ।
उ अवसरमे जि एन बि नेपालके अध्यक्ष प्रकाश खतिवडा, युवालयके कोषाध्यक्ष कृष्ण तामाङ, भिजनरी भ्वाईस नेपालके कार्यकारी सचिव सन्तोष महर्जन, सामाजिक विकासका लागि सचेत समाजके क्रिम चौधरी, जि एन बि ग्लोबलके सृष्टि कोलक्ष्यपती ओ जि एन बि नेपालके ईलावती केसीके सहभागिता रहल रहे । यी संयुक्त पहलसे नागरिक समाज ओ प्रदेश तहबीचके सहकार्यहे थप मजबुत बनैना विश्वास लेहल बा ।
अनुरोध पत्र ग्रहण करटी माननीय पाठक सुदूरपश्चिम प्रदेशहे बालविवाह मुक्त प्रदेश बनैना उद्देश्यसहित प्रदेश सरकारसे आवश्यक नीति निर्माण करके कार्ययोजना अनुसार प्रभावकारी कार्यान्वयन कैना प्रतिबद्ध रहल बटैलै । साथे, सामाजिक विकास मन्त्रालयसँग सहकार्य करटी बालविवाह विरुद्ध सशक्त अभियान सञ्चालन कैना जानकारीफे करैलै ।
उ अबसरमे टोलीसे सामाजिक बिकास मन्त्रालयके सचिब डा. हेमराज रेग्मीसंग बालबिबाह अन्त्यके लाग मन्त्रालयके प्रयास, बालबिबाह अन्त्यके लाग प्रादेशीक रणनिती ओ कार्ययोजना बनैना जिएनबी नेपालके सहकार्य रना ओ कार्यगत एकता करे सेक्नाबारे छलफल समेत हुइल रहे । यी पहल केवल पत्र बुझैना औपचारिकता केल्ह नैहुके, बालबिबाह अन्त्यके लाग बालअधिकार, लैंगिक न्याय ओ सामाजिक रूपान्तरणओर उन्मुख साझा प्रतिबद्धताके प्रतीक हो ।
अब लैगिंक रुपान्तरण करटी बालबालिकामैत्री ओ न्यायपूर्ण समाज निर्माणओर ठोस कदम चल्न समय आइल जिएनबी नेपालके अध्यक्ष प्रकाश खतिवडा बटैलै ।
