‘आर्थिक सशक्तीकरणके लाग सहयोग कैना तयार बाटी’
पहुरा समाचारदाता
धनगढी, १० अगहन । सुदूरपश्चिम प्रदेशके भूमि व्यवस्था कृषि तथा सहकारी मन्त्री विनिता चौधरी आर्थिक सशक्तीकरणके लाग महिलाहुकनहे सहयोग कैना तयार रहल बटैले बाटी ।
महिलाहुकनके आर्थिक सशक्तीकरण ओ दिगो जिविकोपार्जनके लाग सरोकारवालाहुकनसंग बुधके रोज कैगिल प्रदेश स्तरीय कार्यशाला गोष्ठीमे मन्त्री चौधरी प्रदेश सरकारसे महिलाहुकनके लाग टमान मेरिक कार्यक्रम संचालन करल बटैली । उहाँ कहली, ‘व्यवसाय तथा कृषि करे चाहल डिडीबाबुकनके लाग प्रदेश सरकारसे सहलियत तथा विना धितो लोनके व्यवस्था कैगिल बा, टमान महिला कृषि समूहके लाग टमान शिषकमे कार्यक्रमफे नानल बा ।’
सामाजिक विकास मन्त्रालयसे द्वजारिका देवी ठकुरानी महिला सशक्तीकरण कार्यक्रम ओ भूमि व्यवस्था कृषि तथा सहकारी मन्त्रालय अन्तर्गत कृषि ज्ञान केन्द्र मार्फत कृषिमे सहयोग करल उहाँ बटैली ।
अब्बे महिला हिंसा विरुद्धके १६ दिने अभियान सुरु हुइल प्रसंगमे महिलाहुकन हेर्ना गलत प्रवृतिके अन्त्य कैना जरुरी रहल मन्त्री चौधरी बटैली । ढेर जैसिन महिला महिलासे पीडित हुइल ओरसे सबसे पहिले घरेलु हिंसा न्यूनीकरण उहाँ आग्रह करली ।
विद्यायन समिति सभापति नेपालु चौधरी प्रलोभन डेखाके मानव बेचविखनमे पारल बटैलै । महिलाहुकनके हरेक ठाउँमे पहुँच पुगैलेसे हिंसा न्यूनीकरण हुइना उहाँ कहलै । महिला हिंसा घर, परिवारसे सुरु हुइठ, पहिले अपनठेन बन्द करी हिंसा अपनही न्यूनिकरण हुइटी जैना सभापति चौधरी कहलै ।
सुदूरपश्चिम प्रदेशके सुदूरपश्चिम प्रदेशसभा सदस्य पूर्णा जोशी वर्ग नीति बनाके आघे बह्रना जरुरी रहल बटैली । उहाँ कहली, ‘शिक्षा ओ आर्थिक सशक्तीकरण हुइलेसे केल महिला हिंसा न्यूनीकरण हुई ।’
प्रदेशसभा सदस्य कुन्ती जोशी अनुदान लक्षितवर्गमे नपुगल बाट आइल ओरसे सरकारके ध्यान जैना जरुरी रहल बटैली । कोरोनाके कारण चाहल अन्सार काम करे नइसेकल उहाँ कहली ।
कृषि विकास बैंक धनगढीके क्याम्पस रोड शाखाके चक्रवीर भण्डारी प्रदेश कार्यक्रम अन्तर्गत शैक्षिक प्रमाणपत्रके आधारमे महिलाहुकनके व्यवसायिक लोन डेटी रहल बटैलै । यूएन डिपीके बैजन्ती सिंह महिलाहुकनके आत्मनिर्भर नइबनाइटसम महिला हिंसा न्यूनीकरण नइहुइना बटैली । अन्तर महिला संजाल पार्टीके पूर्व जिल्ला अध्यक्ष गोमा आचार्य महिलाहुकनसे उत्पादित बस्तुके प्रवद्र्धन कैना जरुरी रहल बटैली । उहाँ कहली, भारतीय उत्पादन रोके सेक्लेसे यहाँक डिडिबाबुनसे उत्पादित वस्तु अपनही प्राथमिकता पाई सेकी ।
गैर सरकारी संस्था महासंघके केन्द्रीय सदस्य सावित्रा घिमिरे आर्थिक रुपमे पाछे परल कारण महिलाहुक्रे हिंसा भोगे परल बटैली । महिलाहुकनहे आर्थिक सशक्तीकरणके लाग दिगो जिविकोपार्जन कार्यक्रम नन्ना जरुरी रहल उहाँ बटैली ।
गैर सरकारी संस्था महासंघ सुदूरपश्चिम प्रदेश संयोजक देवी खनाल महिलाहुकन सामान काम मने ज्यालामे विभेद हुइल बटैलै । महिलाहुकनसे संचालन करल व्यापार व्यवसायहे प्रोत्साहन आवश्यक रहल उहाँ कहलै ।
इन्सेक सुदूरपश्चिम प्रदेश संयोजक खडकराज जोशी समाजमे करके खैना टमान डिडीबाबु रहल बटैलै । उहाँ कहलै, ‘प्रदेश सरकार अपन दायित्व सम्झटी आवश्यकता अन्सार नीति तथा कार्यक्रम नाने परल ।’ ढेर जैसिन डिडीबाबु आर्थिक स्रोत साधान, सीप नइपाके करे चाहल कृषि तथा व्यवसायसे बन्चित रहल संयोजक जोशी बटैलै ।
कार्यक्रममे गौरीगंगाके तुल्सी शर्मा, पार्वती बुढाऐर, गोदावरीके पशुपति बुढामगर, टीकापुरके आशा चौधरी, लम्की चुहाके आशा चौधरी, केउली चौधरी, पुष्पा चौधरी प्रदेश सरकारसे महिलाहुकन कृषि व्यवसायके सहलियत तथा शैक्षिक प्रमाणपत्रके आधारमे लोनके व्यवस्था, सीप अन्सार रोजगारीके व्यवस्था, जिविकोपार्जनके लाग सीपमूलक तालिमके व्यवस्था कैडेना आग्रह करल रहिट ।
राष्ट्रिय अग्रणी र सहज संजालके अध्यक्ष सोनीय चौधरीके अध्यक्षतामे हुइल कार्यक्रममे ओरेक नेपाल कैलालीके संयोजक विनु राना सहजीकरण करले रहिट । उहाँ ओरेक नेपालमे २०४ ठो टमान घटना दर्ता हुइल बटैली ।
कार्यक्रममे स्वागत मन्तव्य ओरेक नेपालके वरिष्ठ कार्यक्रम संयोजक सविता पोख्रल ओ धन्यवाद केन्द्रीय सचिव चाँदनी राना डेहल रहिट । भर्जुअल कार्यक्रममे प्राविधिक सहयोग ओरेक नेपालके जिल्ला कार्यक्रम संयोजक गिता चौधरी करल रहिट । ओरेक नेपालके सहयोगमे हुइल कार्यक्रमके आयोजना अग्रणी र सहज संजालसे कैगिल रहे ।
सम्बन्धित समाचार
लैङ्गिक हिंसा विरुद्धको १६ दिने अभियान: कैलारीमे विविध कार्यक्रम कैना
