अपांगता मानवअधिकार सम्बन्धी अन्तरसंवाद कार्यक्रम

पहुरा समाचारदाता
धनगढी, २५ अगहन । अन्तर्राष्ट्रिय मानवअधिकार दिवसके अवसरमे अपांगता मानवअधिकार सम्बन्धी अन्तरसंवाद कार्यक्रम हुइल बा ।

सर्वाड्डिण अपांगता विकास समाज नेपाल, दिगो विकास समाज भजनी, ओरेक कैलाली, कमैया प्रथा उन्मुलन समाज ओ हलिया महासघके सयुक्त आयोजनामे सुदूरपश्चिम प्रदेशमे अपांगता रहल व्यक्तिहुकनके मानवअधिकारके अवस्था विषयक सरोकारवाला ओ मिडियासंगके अन्तरसंवाद कार्यक्रम हुइल रहे ।

अपांगता अभियन्ता नरराज गिरीके सभाध्यक्षता ओ राष्ट्रिय मानवअधिकार आयोग सुदूरपश्चिम प्रदेश प्रमुख मोहनदेव जोशीके वडका पहुनामे कार्यक्रम हुइल रहे । ओ विशिष्ट पहुना धनगढी नगर अपांगता समन्वय समितिके सदस्य भीमबहादुर शाह रहल रहिट । कार्यक्रममे अपांगता अधिकारकर्मी नन्दराज भट्ट सुदूरपश्चिम प्रदेशमे अपांगता रहल व्यक्तिहुकनके मानवअधिकारके अवस्था ओ कार्यान्वयनके अवस्था सम्बन्धमे कार्यपत्र प्रस्तुत करले रहिट ।

अपांगता अधिकारकर्मी नन्दराज भट्ट सुदूरपश्चिम प्रदेशमे अपांगता रहल व्यक्तिहुकनके मानवअधिकारके अवस्था विषयक २१ बँुदे ध्यानाकर्षणपत्र मानवअधिकार आयोग सुदूरपश्चिम प्रदेश प्रमुख मार्फत नेपाल सरकारहे बुझागिल रहे ।

ध्यानाकर्षणपत्रमे अपांगता रहल व्यक्तिहुक्रे प्रदेश स्तरीय तथ्यांक अद्यावधिक कैना डिजिटल प्रोफाइल बनाई पर्ना, सक्कु प्रकृति ओ प्रकारके अपांगता हुइल व्यक्तिहुकनके निःशुल्क स्वास्थ्य बिमा लागु हुई पर्ना, अपांगता अवस्था, अध्ययन, अनुसन्धान सेवा विश्लेषण कैना प्रदेश स्तरीय सर्भेक्षण आयोग निर्माण हुई पर्ना, प्रदेशभिटरके अति अशक्त, पुर्ण अशक्त, बहिरा, दृष्टिविहिन, अटिज्म ओ मनोसमाजिक अपांगता हुइल व्यक्तिहुकनके लाग पारिश्रमिक सहितके दोभासे ओ व्यक्तिगत सहयोगीके व्यवस्था हुई पर्ना ध्यानाकर्षणपत्रमे उल्लेख बा ।

प्रदेशभिटरके सक्कु श्रोत विद्यालय मर्ज करके एकीकृत समावेशी बहुउद्देश्यीय विद्यालय स्थापना हुई पर्ना, प्रदेश अपांगता सूचना केन्द्र हेल्पेडेस्कमे सांकेतिक भाषा अध्ययन तथा ब्रेल अडियो लाइब्रेरीके स्थापना हुई पर्ना, सांकेतिक भाषा ओ ब्रेल भाषाहे सरकारी मान्यता प्रदान करके सरकारसे दैनिक दस्तावेजमे प्रयोग करे पर्ना कहल बा ।

अपांगता पारा स्पोर्ट्स, ऐथ्लेतिक्स संचालन कैना पारा स्पोर्ट्स कभर्डहल निर्माण हुईपर्ना, अपांगता हुइल व्यक्तिहुकनहे संचार ओ ईन्टरनेट सेवामे छुट डेहे पर्ना, कोरोनाके लकडाउन प्रभावित अपांगता हुइल व्यक्तिहुकनहे व्यावसायिक तथा कृषि जन्य क्रियाकलाप संचालन कैना बिना धितो ऋणके व्यवस्था हुई पर्ना कहल बा । सहायक सामग्री व्हिल्चैर, सेतो छडी, बैशाखी लगायत उत्पादन, वितरण, मर्मत, थेरापी, मनोपरामर्श सहितके प्रदेश पुर्नस्थापना केन्द्रके स्थापना हुई पर्ना कहल बा ।

सामाजिक विकाश मन्त्रालय मार्फत समुदायमे आधारित पुनस्र्थापना कार्यक्रम लागु हुई पर्ना, पिउने पानी सहित सार्वजनिक स्थानमे पहुँचयुक्त शौचालय स्थापना हुई पर्ना, नयाँ बन्न सडक ओ भौतिक संरचनामे व्हिल्चियर डगर, संकेत ब्लक राखे पर्ना, बैंकिङ तथा वाणिज्य कार्यालय सक्कुके पहुँचमे रहन निति अख्तियार हुई पर्ना माग करल बा ।

स्वास्थ तथा परामर्श सेवा सहितके प्रदेश अपांगता आपत्कालीन कोष स्थापना हुई पर्ना, प्रदेश लोकसेवा आयोगसे अपांगता हुइल व्यक्तिहुकनके लाग अपांगताके आधारसेफे अपांगता गम्भीरताके वर्गीकरण अन्सार विज्ञापन करके पदपूर्ति कैना व्यवस्था करे पर्ना, अपांगता हुइल महिलाके लाग अलग विज्ञापन हुई पैना माग करल बा ।

अपांगता रोजगारी तथा सशक्तीकरण कैना प्रदेशस्तरमे बर्सेनि अपांगता रोजगार सम्मेलन हुई पर्ना, दीर्घकालीन अशक्तता ओ रोगसे ग्रसित अपांगताहे निःशुल्क स्वास्थ सामग्री तथा निःशुल्क औषधि उपचारके व्यवस्था हुई पर्ना, अपांगता सम्बन्धी काम कैना संघ सस्थाहुकनहे अपांगता अधिकार ओ अभियान संचालन कैना निश्चित अनुदानके व्यवस्था हुई पर्ना, दीर्घकालीन सीप विकाससंगे घरबार बिहिन तथा असहाय अपांगताके उचित व्यवस्थापन हुई माग करल बा ।

अपांगता वेरोजगार व्यक्तिहुकनके सूची तयार करके सार्वजनिक ओ सामुदायिक सरोकारके काममे रोजगारी सिर्जना करके स्वरोजगार बनैना, जटे सवाल समावेश करके संचालन करल कार्यक्रममे अपांगता अभियन्ता भीम शाह, चक्र विक, विनु राना, हिरा नाथ लगायत प्रबुद्ध व्यक्तित्वहुक्रे टिप्पणी करले रहिट ।

राष्ट्रिय मानवअधिकार आयोग प्रदेश प्रमुख मोहनदेव जोशी अपांगता मुल प्रवाहीकरण कैना यी सवाल सरकारसे अनिवार्य कार्यान्वयन करे पर्ना सवाल रहल ओ यी सवाल कार्यान्वयनके लाग नेपाल सरकारहे सिफारिस कैना प्रतिवद्धता जाहेर करलै ।

हलिया महासंघके सयोजक पदमराज जोशी स्वागत मन्तव्य ओ संचालन अपांगता अधिकारकर्मी नन्दराज भट्ट करले रहिट । कार्यक्रममे ४० जानेक उपस्थित रहल रहे ।