मुक्त कमैयाहुक्रे मिनि ह्याचरीसे चिङ्गनी उत्पादन
पहुरा समाचारदाता
धनगढी, ०१ पुस । कैलालीके मुक्त कमैयाहुक्रे काटुनमे मिनि ह्याचरी बनाके लोकल मुरगीक चिङ्गनी उत्पादन करे लागल बटै ।
कार्टुनमे मिनि ह्याचरी बनैना तालिम पाइलपाछे ओइने व्यवसायिक रुपमे चल्ला उत्पादन कैना तयारी करले बटै । विगत कुछ वर्षसे व्यवसायिक रुपमे लोकल मुरगीपालन करटी रहल ओइने चिङ्गनी उत्पादनफे व्यवसायिक रुपमे करे लागल बटै ।
गौरीगंगा नगरपालिका वडा नम्बर १ चनौराके लक्ष्मी चौधरी मिनि ह्याचरी बनैना ओ सञ्चालन कैना तालिम पाइलपाछे लोकल मुरगीक चिङ्गनी उत्पादन सुरु करले बटी । उहाँ कहली, ‘मुक्त कमैया महिला विकास मञ्चसे तालिम पाइलपाछे पहिले काटुनमे ठोर–ठोरचे अण्डा घोराई, आब लोहक फ्रेमके ह्याचरी मेसिन डेहलपाछे ढेर चिङ्गनी उत्पादन करे सेक्जाई ।’
मुक्त कमैया महिला विकास मञ्चके कार्यक्रम संयोजक ईन्द्र चौधरी मुरगीक अण्डा घोरना ओ बच्चा हुकैना ह्याचारीके लाग ६ जनहनमे प्रतिव्यक्तिहे २५ हजार २ सय ३६ रुप्याके बराबरके सामान सहयोग करल बटैलै ।
ओम्ने आइरन फ्रेम, प्लाईउड, डिजिटल थर्मामिटर, फेविकल, रेगुलेटर, मिस्त्री खर्च सहितके रकम सहयोग करल उहाँ बटैलै ।
उहाँ कहलै, ‘सामान्य बनाई चाहलेसे पाँच सयसे हजार रुप्यकफे बनजाइठ, महंगा बनैलेसे टिकाउ ओ ढेर मात्रामे अण्डा घोरैनासके साथे बच्चा बह्रैना २५ से ३० हजार रुप्याके ह्याचरी मेशिन बनाई सेक्जाइठ ।’
पहिलेसे काटुनमे मिनि ह्याचरी बनाके लोकल मुरगीक चिङ्गनी उत्पादन करटी रहुइयामे व्यावसायिक करिट कहटी अण्डा घोरैनाके साथे बच्चा हुरकाई मिल्न मेसिनके लाग सहयोग संयोजक चौधरी बटैलै । ओस्टेक करके कैलारीमे ३, गौरीगंगामे २ ओ गोदावरीके हरिनगरमे ५ जनहनहे सहयोग कैना उहाँ जनैलै ।
मुक्त कमैया महिला विकास मञ्चसे कैलारी गाउँपालिका ओ गौरीगंगा नगरपालिकाके ८६ परिवार मुक्त कमैयाहे लोकल मुरगीपालनमे सहयोग करटी आइल बा । उ मन्से ७८ परिवारके एक/एक सदस्यहे कार्टुनमे ह्याचरी बनैना ओ सञ्चालन कैना तालिम डेहल मञ्चके कार्यक्रम संयोजक चौधरी बटैलै । मुरगीपालन सुुरु करल मुक्तकमैया मन्से ३० परिवार व्यवसायिक रुपमे लोकल मुरगी पाले लागल उहाँ बटैलै ।
काटुनमे बनाइल मिनि ह्याचरी एक चो ३० ठो सम अण्डा घोराई सेक्जाई कलेसे लोहक/कठुवा लोहक बनाइल ह्याचरीमे साइज अन्सार अण्डा घोराई सेक्जाइठ । काटुनमे मिनि ह्याचरी बनैलेसे एक ठो कार्टुन, एक ठो ६० वाटके साधारण चिम, एक ठो रेगुलेटर, एक ठो थर्मोमिटर ओ कुछ मिटर विजुलीके तार हुइलसे पुगठ ।
लोहक/कठुवक मिनि ह्याचरी बनैना प्लाई, सनमाइका, थर्मोमिटर, फेविकल, काठ वा फलामके फ्रेम, रेगुलेटर, विजुलीके तार, चार ठो ६० वाटके साधारण चिम, ढोकाके लाग कब्जा, लकर, हिण्डल लगायतके किलाकाँटा आवश्यक पर्ना कार्यक्रम संयोजक चौधरी जनैलै ।
२०१९ मे ५० ओ २०२० मे ३६ परिवार मुक्त कमैयाहे लोकल मुरगी पल्ना सहयोग करल उहाँ बटैलै । उहाँ गौरीगंगा–१, चनौराके लक्ष्मी चौधरी, ४ कुटिकटानके चन्द्रवती चौधरी, कैलारी–८, खैरीपुरके गीता चौधरी, वडा नम्बर ६ हिरापुरके अञ्जु चौधरी ओ मनिषा चौधरी ओ वडा नम्बर ५ के एक जनहनहे लोहक पे्रmमके मिनि ह्याचरी डेहल बटैलै ।
ओस्टेक करके, १७८ परिवारहे बंगुरपालन ओ ३८ परिवारहे छेगरीपालनमे सहयोग करटी रहल कार्यक्रम संयोजक चौधरी बटैलै । उहाँ बंगुरपालनमे ४/५ परिवार व्यवसायिक रुपमे सफल हुइल बटैलै । ढेर जैसिन परिवार लोकल मुरगीपालनमे मजा करटी रहल उहाँ बटैलै ।
लोकल मुरगीपालन कैना मन्से कुछ कडकनाथ, बटाई ओ टर्की समेत पाले लागल बटै । लोकल मुरगीपालनसंगे कडकनाथ, टर्की ओ बटाईपालन करटी रहल सीमान्तकृत किसान सुनिल चौधरी व्यसायिक रुपमे काम करलपाछे आम्दानी बढल बठैलै ।
उहाँ रानीखेत जैसिन रोगसे जोगिन भ्याक्सिन प्रयोग करेबेर लोकल मुरगीनहे मजासे हुरकाई सेकल बटैलै । उहाँहे मञ्चसे तालिमके साथे १५ हजार मुरगीक खोरमे सहयोग करले बा । सुनिल अपनहीफे ४४/४५ हजार लगाके बलगर खोर बनाके व्यावसायिक मुरगी पालन करटै ।
