दश स्रष्टा सम्मानित
पहुरा समाचारदाता
धनगढी, ६ पुस । जंग्रार साहित्यिक बखेरीके दश बरसके अवसरमे बर्दियाके पर्यटकीय केन्द्र ठाकुरद्वारामे ‘थारु साहित्यिक बखेरी’ भव्य रुपमे सम्पन्न हुइल बा ।
थारु भाषा साहित्य ओ संस्कृतिके प्रचार प्रसार, विमर्श ओ संवाद करटी संचालित सम्मेलनमे नेपाल संस्कृति विश्वविद्यालयके उपकुलपति प्रा.डा. यादवप्रकाश लामिछाने रहल रहिट । डा. लामिछाने नेपाल संस्कृत विश्वविद्यालय थारु सघनबस्तीके बीचमे रहल ओरसे थारु समुदाय फाइदा लेना वातावरण बने परनामे अपने स्पष्ट रहल बटैलै ।
यकर साथे थारु भाषा, साहित्य ओ संस्कृतिके उन्नतिके क्षेत्रमे थारु समुदायके विद्धान लेखक, अनुसन्धानकर्ता ओ साहित्यिक संस्थासंग सहकार्य करके जैना प्रतिवद्धता जनैलै । उपकुलपति ढिरेसे थारु समुदायके विद्यार्थी फेन बह्रटी रहल जानकारी डेलै ।
अनुसन्धानकर्ता तथा लेखक ओ राजनीतिकर्मी डा. गोपाल दहित थारुहुक्रे अपन इतिहास अपनही लिखे परना, पुरान साँस्कृतिक सम्पदाके संरक्षण नै करके पहिचान स्थापित नै हुइना कहटी लेखक अनुसन्धानकर्ताहे लिख्न हौस्यइटी उत्कृष्ट कृतिके प्रकाशनके लाग युनिक नेपाल खुल्लादिलसे सहयोग कैना बटैलै ।
गुठी संस्थानके पूर्व अध्यक्ष एवं नेत्रलाल अभागी प्रतिष्ठानके संस्थापक लक्ष्मणराज ज्ञवाली थारु लोकसाहित्यके क्षेत्र वृहत रहल बटैलै । बारबर्दिया नगरपालिकाके नगर प्रमुख दुर्गाबहादुर थारु (कबीर) थारु नेपाल संस्कृत विश्वविद्यालय थारु भाषा विभाग बनाके काम करे सेक्लेसे उपलव्धी हुइना सुझाव डेहल रहिट ।
जंग्रार साहित्यिक बखेरीके संरक्षक सुशील चौधरी थारु लोककला ओ सौन्दर्यके विषयमे चर्चा करल रहिट । उ क्रममे थारु सौन्दर्यशास्त्रके विवेचना हुइ परना आवश्यकता बटाइल रहिट । पत्रकार तथा लेखक डा. कृष्णराज सर्वहारी थारु साहित्य सम्मेलन कोरोनाके बीचमे नयाँ उर्जा थपल बटैलै ।
थारु कल्याणकारीणी सभाके जिल्ला सचिव हरिहर थारु साहित्यिक कार्यक्रममे सहभागी हुइ पाइलमे लौव बाट सिख्टी रहल बटैलै । नेपाल पत्रकार महासंघ बर्दिया शाखाके अध्यक्ष राजेन्द्रप्रसाद धिताल बर्दिया बरवार बरवार साहित्यक सम्मेलन हुइटी रहल ओरसे स्पष्ट करठ की बर्दिया जिल्ला साहित्यमे कट्ना उर्वर बा कहिके ।
लोक संस्कृतिकर्मी ठग्गुलाल थारुहे गुर्वावाके रुपमे सम्मानित करके सुरु हुइल औपचारिक कार्यक्रममे दस जहन स्रष्टाहे सम्मानित करगिल रहे । सम्मानित हुउइयामे डा. गोपाल दहित (बर्दिया), थारु जनकवि बमबहादुर थारु (रुपन्देही), एकराज चौधरी (बर्दिया), श्रीराम चौधरी (दांग), भगवती प्रसादथारु (देउखर), दिलबहादुर चौधरी (कैलाली), शर्मिला चौधरी (सृष्टि) कंचनपुर ओ सुमित्रा चौधरी (बर्दिया) रहल रहिट ।
युनिक नेपाल ओ पर्यटन व्यवसायी मोहनलाल थारुहे साहित्यिक अभियानहे सहयोग करलमे सम्मान करगिल रहे । ओस्टके कार्यक्रममे जंग्रार साहित्यिक बखेरीके प्रकाशन जंग्रार बखेरी ओ कविदशरथ थारु (सुदिन) के प्रगतिशील कविता संग्रह बेलभार विमोचन करगिल रहे ।
रुपन्देही, दांग देउखुरी, बाँके, बर्दिया, सुर्खेत, कैलाली, कंचनपुर ओ काठमाडौंके स्रष्टाहुकनके सहभागिता रहल रहे ।
