बरघरमे महिला नेतृत्व
अब्बे थारु गाउँमे गाउँक् समिक्षा हुइनाके साथ साथे गाउँक् अगुवा बरघर, भलमन्सा, महटाँवा, ककनडार चुन्ना क्रम जारि बा । जे मजा काम कैले बा, भुरा खेलसे उ फे डुबारा जिम्मेवारिमे अइटि बा । गाउँक् जनता मन पराइलमे फे कोइ बरघर अपन सेकारि नै हुइना कहिके जिम्मेवारिके भरवा बिसैटि बटाँ ।
इहे क्रममे घोडाघोडी नगरपालिका वडा नम्बर १० लठैया गाउँके भुरा खेलसे ईन्द्रादेवी चौधरी भल्मन्सा चुन गैल बाटी । उहाँ २ बरसके लाग भल्मन्सा चुन गैल पुरान भल्मन्सा श्रवण चौधरी बटैले बाटैं । ईन्द्रादेवी आपन गाउँक टमान विकास निर्माण क्षेत्रमे हरडम अग्रपंक्तिमे रहिके काम करना प्रण कर्ले बाटी । उहाँ गाउँ चलाइक लाग आपन कन्ढा बलगर बनाके गाउँक नेतृत्व सम्हारे आघे बर्हना जनैले बाटी ।
खोज्ना हो कलेसे ईन्द्रादेवीहस आउर फे महिला गाउँक् बरघर, भलमन्सा इ बरस चुनगैल समाचार मिल्ने बा । मने अंग्रिमे गने लाइक किल । गइल स्थानीय चुनाव हेर्ना हो कलेसे वडा सदस्यमे महिला जनप्रतिनिधि अनिवार्य टोकगैल बा । इहिले नेतृत्वमे महिला आगे अइना चाहि कना परिकल्पना कैगैल बा । मने थारु गाउँके बरघर चयनके अभ्यासमे महिला अभिन बहुट पिछरल बटाँ ।
गाउँक् भुरा खेलमे एक घरक एक सदस्य अनिवार्य सहभागि हुइ परठ । सहभागि हुइल अनुहार हेर्बि कलेसे सब हस पुरुष किल रठाँ, जिहिले महिला नेतृत्वमे अइना स्वतः कम बिल्गाइठ । ओहेसे भुरा खेलमे जो महिलन्के सहभागिता बह्राइ पर्ना जरुरि बिल्गाइठ ।
कमैया मुक्तिके घोसनापाछे स्थापना हुइल लावा बस्तिमे महिला बरघर बनल बहुट सुनजाए । गाउँक अगुवाइ कैसेकल कैलालीक् सुकदैया चौधरी पाछे सांसद बन्लि । गाउँक अगुवाइ कैसेकल कृष्णी चौधरी आब प्रदेश ५ के उपसभामुख बटि । मने आब मुक्तिके घोसनापाछे स्थापना हुइल लावा बस्तिमे फे नेतृत्वमे महिलन्के कम सहभागिता सुनजाइठ । सुकदैया, कृष्णी हस आगेटागे रहल महिलालोग माघम अपन गाउँ ठाउँक अग्वाइ करक लग महिला टयार रह परठ कना खबरडारि करक चाहि ।
कहुँ कहुँ अक्केठो बरघर किल नै चुन्के बरघर समिति फेन बनैना नियम बन्टि बा । असिनमे समितिमे महिलन् अनिवार्य सडस्य बनैना जरुरि डेखाइठ । घरेसे महिलन् बाहेर नै निकारट सम समाज आगे नै बह्रि कना बाट आब थारु पुरुषहुक्र बुझ्ना चाहि । ओस्टक हम्रे विद्रोह कैक फे चुल्हिचौकासे फुर्सड निकारके सामाजिक सेवामे लग्ना चाहि कना बाट महिलाहुक्र बुझ्ना चाहि । टब किल सुन्दर समाज बने सेकि ।
सामान्यतया बरघर अक्के बरसके लग चुन्जाइठ । मने ईन्द्रादेवी चौधरी २ बरसके लग चुनगैल समाचार बा । भुरा खेलमे समय अनुसार गाउँक् नियम बनैना गँवल्यन स्वतन्त्र बटाँ । निस्चय फे अक्के बरसमे खासे कुछ करे नैसेक्जाइठ । ओहेसे बरघरके समयावधि बारे फे विचार कर्ना आजुक आवस्यकटा हो । ईन्द्रादेवी लगायट लावा चुन्जैटि रलक सक्कु बरघरहुकन गाउँक् विकासमे मजा काम करिट कना शुभकामना ।
सम्बन्धित समाचार
