बुडी, बुह्रान ओ थरुहट पहिचान

आज बुडीसे बाट कर्नु नस्स से । बाट कर्टी कर्टी पुछ्नु बुडी ट्वार लह्यर दाङक कौन गाउँम कहाँ रह कैक ?

बुडी कठा, ‘कहाँ रहि मज्गाँवा ट रह कहुँ ।’ सक्कु बाट पुछ लग्ठु मै ।

–बुडी कसिन रह टुनक गाउँ ? पैल्ह ट सक्कु जन ठकुर्वक घर काम कर जाइट कहुँ । टैँ जाइस कि नाइ ट ?

बुडी कठा– नै जइब्या कि का ट । बिना गिल कसिक कल्वा बेरी खैना हो ।

टब मै पुछ्नु– बुडी, सक्कु काम करो ट ठकुर्वा खाइक्लाक डेह कल्वा बेरी ?

टब जौन बाट बुडी कहल, उह बाट सुन्क म्वार आँखिमसे पानीक जुहार ट फुटल फुटल । संग संग बिद्रोहके बर्वार भावना फेन इ मन्म आइल ।

बुडी हँ फे पुछ्नु– बुडी बुह्रन कसिक अइलो ?

बुडी सुरु करठ, आपन बुह्रान अइलक बाट । लह्यर मज्गाँवा कसिक बुह्रान आइल कना बाट । ठकुर्वक घर सड्ड काम कर जाए जो पर्ना । बर ढ्यार ढ्यार खेट्वा रना । सक्कु थारुकेल रहल गोट्गाट बौनन् रहल हुकहनक ट खेट्वा लगाइ जैना कहुँ । कौनो कौनो जग्घा अढ्या बटैया करक लाक डेना न कि ट सक्कु जग्घा ट ओस्ट बिना अढ्या बटैयक हम्र लगाइ पर ।

अढ्या बटैया लगैलसे एक कुर हम्र पाइट डु कुर हुँक्र लेहेट । फेर बौनन्के बेगारी जैना बा । हुँकहनके सक्कु काम कैदेहे जैनाबा आपन लौकम मार जाँर लेक जाक आपन अन्न खाक हुकहनके काम कैडेना बिना डस्टुरके ।

आपन खा खा काम, आप अउर जहनके कर नैसेक्जाइ कैक डाङगक् मनै बुह्रान भग्ल । आपन खेट्वा अउर जहनके लाक लगैली । टौनो फेन आपन खेट्वा अउर जहनके लाक छोर्क अइली हम्र ।

लव ठाउँ कसिन बा का बा मनै वनै बैठ्ठ की नाइ ? कुछु पटा नैरह । वत्र रहकि हम्र आप यी ठाउँम आप बैठ नैसेक्बी ढ्यार होगिल ठकुर्वनके काम । आपन खा खा कत्रा डिन सम्म काम कर्ना हो कना । मकै निकाय जैना, लुर फेँकाइ जइना सक्कु सक्कु काम कैडेहे जाइ पर । सक्कार जाक ठकुन्यक सक्कु भाँरा ढो डेउ का काम नै करल हुइबी ।

इ बाट सुनक क्याकर मनम जुर नैलागठुइ । कमैया नै बैठबी आप हिकनसे ट आप लर परल, कना चिज जो उह समयम थारु नै सोच सेक्ल सोच्ल ट केवल कसिक यी ठाउँ छोर्क जाइ कना । जौन चिज कर्ल फे । अग्ला बुह्रान पछ्ला बुह्रान हुइटी कमैया प्रठासे छुट्कारा पाइ खोज्ल ।

हम्र अत्र किल सोँचि ट कौनो डिन आपन सक्क बैठल बस्यारा लेक और ठाउँ जाइट । मनैनके मन्म बिद्रोहके भावना वस्ट अइना चिज नैहो । थारु हुकन जौनो फेन काल खण्डम अस्टँहक डबैल व भुँयम से उठ निडेहेट । हो यी बाट कह्या सम्झबि हम्र ।

आब डाङ बुह्रानके सम्बन्ढ हेर्बो कलसे कत्रा संघर्ष कैक थारु आपन अस्टिट्व बँचाइ खोज्ल बाट । थारु हुँक्र जब आपन पहिचान ओरैटि गैलक पटा पाइ लग्ल टब सुरु हुइट थारुनके पहिचान व अस्टिट्व बँचाइ कना संघर्ष । जौन आन्डोलन वस्टहँक कैक संघर्ष आभिन सम्म चल्टी बा ।

थारु हुकनके पहिचानके संघर्षके बर्वार भारी उडाहरन डेबी कलसे सायद सक्कु जहनके मनम टीकापुर घट्ना कैक जरुर आइ । इ इटिहासके कबु नै बिस्साइ सेक्जैना संघर्षके बर्का उडाहरन बन्गिल बा । लोकटान्त्रिक समाजम अलोकटान्त्रिक व्यवहार राज्यके कलसे फेन फरक नै परि ।

ओत्रा बरस ठकुर्वक डमन सहली जब पहिचान मङ्गली, टब राज्यके और ठकुर्वा, का खर बर्का टैँ भारी बन्ट्या कैक जब चार डेवालक बिच हमार आवाज हँ डबाइ खोजल टब फे और संघर्षके बोली फे फुटी कैक यी जातिवादके सोचाइ रहल डमनकारी राज्य हँ के सम्झा डी ?

जब जब थारुनके बोली चुना लगाक पक्की इट्टक भिट्टर ढर खोजी टब टब थारु बोली । सरकार राज्यके कुरुर व्यवस्ठा हँ हामार थारुने बर्वार बोली ढरटी यी ।

संघर्षके डगर कहाँ लिर्वास रठा । हम्र संघर्ष कर्लि, करटी और कर्टी रबी जब सम्म पहिचानके रेखा नै भेटाजाइ । बिगटसे आब सम्म हेर्ना हो कलसे थारुनके संघर्ष कौनो पन्नाम नै लिख्गील हुइ टर यी कुरुर शासन सट्टा हँ जरुर पटा बाटस आज का कर्टा और पैल का कर्ल रह कना ।

ज्ब जब बोल्ली टबटब हमार बोलीम सैला लगाक बन्ड कर खोजल आजफेन उहँ कर जाइटा खबरडार नश्लिय बिचार ढाराम सैला लगैना काम आप बन्ड कर । टीकापुर एक चो उठल यह टीकापुर जस्ट हजारौँ टीकापुर फे उठी यडि नश्लिय विचार ढाराके और पहिचानके जे रंग मेटाइ खोजी ट ।

बचल भौगर लक्ष्मण थारु

जब हमार बुडी बुबा, काका काकी, बाबा डाइ जस्ट हजारौँ थारु हुक्र अग्ला बुह्रान पछ्ला बुह्रान छारा होक आँसक जुहार चुहैटी अइल आपन कर्म जन्म भुमि छोर्क बौनन्के कारन ओक्रहक बिरुड्ढम बर्वार उठल बोली हो टीकापुर घटना । हमार पुर्खनके आँसक म्वाल टिर ट जरुर परि नश्लिय विचार रहल राज्य सट्टा हँ ।

यह टीकापुर घटनाम मुछ् गैल मनै हुइट लक्ष्मण थारु । लक्ष्मण थारु ३ बरस जेल सजाय खाक निक्रल । जब पुस २ गटे उच्च अदालत दिपायलके फैसला निक्रल मनैन् फे जन्म कैडके फैसला सुनाइल । इहिसे भारी नश्लियवाडी राज्य डमन कौन ड्यासम ड्याख मिली ?

टीकापुर घट्ना हुँइल थारुनके अधिकार पहिचानके लाक । यी घट्ना पाछ जब थारुन खोज खोजक रोज रोजक जेलम डार लागल टब कौनो थारुके बोल्ना आँट साहास नै अइलन । का खर की जे बोल हुकन अपराढीक संग्या डेक ढमा ढम भिट्टर डर्ना काम कर लागल ।

यी घट्ना पाछ थारुनके बोली कहुँ फे नैसुन मिल लागल । का खर की राज्य व्यवस्ठाके यह जो योजना रहलिस । पहिल चुपाइल रहल, आप कहाँसे बोल लग्ल मासिन्या वर्ग भिट्टर रहल मनैन ट हम्र ओस्ट चोप लगा डर्बि जे कैक जे जे आघ टाघ बा हुकनके बोली चार डेवार भिट्टर बन्ड कर्ना प्रयास करल ओ कर्टि बा ।

आस अप्न चुपाक बैठ्बी ट हेर्टी जाइ अइना २० बरस पाछ फेन थारुक लर्का कमैया कम्लरी जरुर बनि । म्वार परल नैहो कना नाहि कि हमन परल बा कैक आघ बह्री ।

पहिचानके लडाइम जेल सजाय पैल लक्ष्मण थारु । थारु आन्डोलन सुटल रहल व्याला जब लक्ष्मण थारु जेलसे अइल टब फे सुरु हुइल थारु आन्दोलनके बहस । कसिक अढिकार और पहिचान पाइ सेक्जाइ कैक ।

बचल भौगर रहल लक्ष्मण थारु । आगी बुटल जस्ट डेखा पर्ठा जब भौगर चलैबो ट भौगर टाटुल और ओकर भिट्र अँग्ठा फेन रठा । वह लागल हमन सक्कु थारुन लक्ष्मण थारु बचल भौगर हुइट कना । जब पुस २ गटेक उच्च अदालतके फैसला आइल टब पटा हुँइट जाट्टिक यी नश्लिय बाहुनवादी राज्य सट्टा थारुन ओराइ जो खोजल हो कैक । जे जे बोलट हुकन सङग्ला लगाक भिट्र ढर्ना कैक कहल । उह हुइल ।

जिट्टी सहिड रेशम चौधरी

पर्गा पर्गा म थारुनके पहिचानके लडाइ हुइल बा । कत्रा लर्टी बाट ट कत्रा जन आट्म समर्पन कैस्याकल बाट । पहिचान के लाक जब संघर्ष कर लग्बो कत्रा डुख अइठा कत्रा कष्ट पिडा सह पर्ठा । यी सक्कु चिज सहल जिट्टी सहिड कैक मै रेशम चौधरी हँ मानम ।

जेलमसे लैजाक सांसडके सपठ ग्रहन कर्वाक फे जेलम आनक बन्ड कर्ना कौन डेसके राज्य व्यवस्ठाम बा ? सम्मान संग अपमान फे ? कि थारु हो सांसडके लोगो लगैना कैनो अढिकार नैहुइटिस कैक ?

मनैनके बोली जब कुरुर नश्लिय सरकार नैसुन लागट, टब कलम और अक्षरके बर्वार भुमिका रहठ, आपन आवाज समाज सम्म पुगैना । जब आपन डुख पिडा सुनाइ मुहलेक नै सेक्जाइट, टब कलमके माढ्यमले अक्षर मार्फट आपन पिडा विचार उल्झैबो । सायड टब हुइ चार डेवारक भिट्टर फेन लगाटार आपन कलम चलैटी रहल मनैया कलक रेशम चौधरी हुइहीँ ।

टीकापुर घट्नक बर्का योजनाकार हुइट कैक आरोप लगाक पुस २ गटेक उच्च अदालतके फैसला हो जन्म कैड । आपनलाक नैरह आपन समुडायके लाक रह । बाट रह अधिकार और पहिचानके बाट रह, आपन संघर्षके बाट रह, हमार पुर्खनके आँसक ढारके । के बुझि यी बाट एकठो थारु समुडायके मनैया बाहेक ।

थारु आन्डोलनके अवस्ठा

टीकापुर घट्ना पाछ चुपाइल रहल थारु आप सड्डट ना चुपाइल रहि ? का खर सक्कु जन आब चुपचाप बाटी हम्र ? थारु का खरु एक हुइ नैस्याक ठुइट ? आपन व्यक्तिगट स्वार्ठ ओत्रा भारि हो गिल आप ? पहिचान और अढिकार कना चिज राजनिटि करक लाक किल उठागैल हो कना ढिउर से ढिउर प्रस्न आब उठ्टा ।

जे आप ब्वालक् लाक रह, जे ब्वालटहँ उह मनैया हँ फे यी कुरुर राज्य सत्तासे जन्मकैडके फैसला सुना डारल, जौन कलक और थारुनके मुहम फे बुजा लगैना काम हुइल । जे बोली जन्मकैड । किहिन बा रहर जन्म कैडके ? टर कना हो कलसे आप कत्रा थारुन जेलक भिट्टर ढरि । असिक थारुन डराक, नुक्ल डेख्क मन जाट्टिक कना हो कलसे नस्स रुइट ।

टीकापुर घटनाबारे पुस २ गटेके फैसलाले ३ गटे सक्कु थारु हुक्र डग्री गल्ली गल्ली म उत्रही कना हुइल । टर डुखके बाट १ मैन्हा बिट स्याकल आन्डोलन के कौनो झिल्का फे नै उठल हो यहाँ ।

गोलबन्डी भेला, सम्मेलन कर्ना नाउँम, जे थारु अगुवा कहटी हुक्रह जो सत्ताके प्यार मोह म बल्गर से लागल डेखा परटा । संघर्ष क्याकर लाक ? म्वार लाक कि टुहाँर लाक ? कैक नेग्ना डिन नैहो, संघर्ष हमार पुर्खने चुहाइल आँसक लाक । संघर्ष हमार आपन पहिचान के लाक । अट्र बाट बुझ नै सेक्क मनैनसे आप पहिचानके लडाइके लाक का अपेक्ष्या कर सेक्ठी ।

थारुनके नस्स ढ्यार संघसंस्ठा बा टर थारु कल्याणकारिणी सभा कलक थारुन्के सबसे पुरान संस्ठा हो । यिहीसे बर्का आस रह । टर एक्ठो विज्ञप्टी फे निकार नै स्याकल । इ संस्ठा ट मुअल बराबर हो गिल ।

हम्र अप्न ह ट मिल नै सेकठुइटी और जहनसे हम्र का अस्रा कर सेक्ठी ? बाट पहिचान और अढिकारके हो । व्यक्तिगट स्वार्ठ ह कोन्नोम लगाक हाँठम हाँठ साठम साठ डिट । हेरी हमन आपन अढिकार के लाग कट्रा जहन ज्यालखानाम ढर्ठा ।

आस आपन पुस्टा सवाँर्क लागि । बलिडानीके कर्रा ढारम ठराइ । ओ, आपन पहिचान के लाग आघ बहरि हेरी के र्वाकट आप हमन । आस अप्न चुपाक बैठ्बी ट हेर्टी जाइ अइना २० बरस पाछ फेन थारुक लर्का कमैया कम्लरी जरुर बनि । म्वार परल नैहो कना नाहि कि हमन परल बा कैक आघ बह्री ।

लेखिका आदिवासी जनजाति लेखक महासंघके अर्थसंयोजक हुइ ।