खोपके लाग स्वाथ्यकर्मीके तथ्यांक संकलन
सुदूरपश्चिममे ३ प्रतिशतहे कोरोना विरुद्धके खोप
पहुरा समाचारदाता
धनगढी, ९ माघ । कोरोना विरुद्धके खोप बिफेक रोज नेपालमे आपुगल बा । भारतसे अनुदानमे उपलब्ध कराइल कोरोना विरुद्धके १० लाख डोज खोप आइलसंगे सुदूरपश्चिम प्रदेश स्वास्थ्य निर्देशनालय ओकर आवश्यक तयारीमे जुटल बा ।
स्वास्थ्य निर्देशनालयसे खोपके लाग अग्रपंक्तिमे खटजैना स्वास्थ्यकर्मीहुक्रनके तथ्यांक फेन संकलन करसेकल बा । स्वास्थ्य निर्देशनालय दिपायलके भेक्टर कन्ट्रोल निरीक्षक हेमराज जोशी खोपके लाग प्रदेशके ९ जिल्लाके अग्रपंक्तिमे खटजैना १४ हजार ६६६ स्वास्थ्यकर्मी सहित झण्डे २६ हजार ७ सय जनहनके तथ्यांक संकलन हुइल जानकारी डेलै ।
संघीय सरकारसे पहिल चरणमे कुल जनसंख्याके ३ प्रतिशतहे पुग्ना मेरके कोरोना भाइरस विरुद्धके खोप सुदूरपश्चिमके लाग पठैना अनुमान करल बा ।
सामाजिक विकास मन्त्रालयके प्रवक्ता नरेन्द्र कार्की कोरोना विरुद्धके खोप प्राथमिकताक्रममे पहिल नम्बरमे रहल स्वास्थ्यकर्मी ओ सुरक्षाकर्मीहे लगाजैना बटैलै । उहाँ एम्बुलेन्स चालक, शव बाहन चालक, स्वास्थ्य संस्थामे कार्यरत कार्यालय सहयोगी, सरसफाईकर्मीहे फेन प्राथमिकतामे राखल उहाँ जानकारी डेलै ।
अग्रपंक्तिमे खटजैना अन्य सरकारी तथा गैरसरकारी संस्थाके कर्मचारीहे समेत खोप लगाजैना जनाइल बा । मने प्राथमिकताक्रममे परलहुक्रनहे खोप लगासेकलपाछे किल अन्यहे खोप लगाजैना बा ।
उहेमारे अब्बे स्वास्थ्य संस्थामे किल कोरोना विरुद्धके खोप, अभियानके रुपमे सञ्चालन कैना तयारी करल प्रवक्ता कार्की बटैलै । यकरसंगे स्वास्थ्यकर्मीहे तालिम डेना लगायतके फेन गृहकार्य सुरु करल बा ।
यहोर सुदूरपश्चिम प्रदेश स्वास्थ्य आपूर्ति व्यवस्थापन केन्द्र खोप भण्डारणके लाग खोप सामग्री भण्डारण कक्षहे खाली कैके तयारी अवस्थामे रख्ले बा । संघीय सरकारके निर्देशन बमोजिम भण्डारण कक्षके व्यवस्थापन करगैल स्वास्थ्य आपूर्ति व्यवस्थापन केन्द्र धनगढीके निमित्त प्रमुख पदमबहादुर बिष्ट बटैलै ।
संघीय सरकारसे सुदूरपश्चिमके लाग कत्रा परिमाणमे खोप पठाइठ् कना आभिन यकिन नैहुइलेसे फेन चरणमे करिब १ लाख भ्याक्सिन पठैना अनुमान करटी उहे अनुसार भण्डारणके व्यवस्था मिलाइल हो ।
‘सरकारसे एक लाखसे ढिउर भ्याक्सिन हमार प्रदेशके लाग पठाइ कना अनुमान रहल बा,’ प्रमुख बिष्ट कहलै, ‘हमारसँग अब्बे तीनठो वाकिङ कुलर बावै । उ मध्ये एकठो पूरे खाली कैके कोभिड विरुद्धके भ्याक्सिन भण्डारण कैना व्यवस्था मिलैले बाटी ।’
स्वास्थ्य आपूर्ति व्यवस्थापन केन्द्रमे २ से ८ डिग्री सेल्सीयस तापक्रममे खोप भण्डारण करे सेक्ना व्यवस्था रहल बा । भारतसे प्राप्त हुइल खोप उ तापक्रममे राखे सेक्ना हुइल ओरसे सहज हुइल जनाइल बा ।
आपूर्ति व्यवस्थापन केन्द्रसँग कुल १६ लाख खोपके भ्याक्सिन भण्डारण कैना क्षमता रहलमे इहे तापक्रममे सुरक्षित राखे मिल्ना खोप प्राप्त हुइलेसे झण्डे ५ लाख भ्याक्सिन भण्डारण करे सेक्ना आपुर्ति व्यवस्थापन केन्द्र जनैले बा ।
भारतसे सिरम इन्स्टिच्युट अफ इन्डिया(एसआईआई)से अक्सफोर्ड विश्वविद्यालय ओ बेलायती औषधि निर्माता कम्पनी एस्ट्राजेनेकासँग मिलके विकास करल कोभिसिल्ड नेपालहे अनुदानमे उपलब्ध करैले बा । अक्सफोर्ड विश्वविद्यालय ओ एस्ट्राजेनेकासे संयुक्त रुपमे विकास करल ‘एजेडडी१२२२’ नामक खोपहे भारतके एसआईआईसे ‘कोभिसिल्ड’के नाउँमे उत्पादन करल हो ।
