सुदूरपश्चिममे १४१२ सक्रिय संक्रमित
पहुरा समाचारदाता
धनगढी, १० माघ । सुदूरपश्चिम प्रदेशमे १४ सय १२ जाने कोरोना भाइरसके सक्रिय संक्रमित रहल बटै ।
सामाजिक विकास मन्त्रालयसे डेहल जानकारी अन्सार प्रदेशके नौ जिल्लामे अभिनसम १४ सय १२ जाने कोभिड–१९ के सक्रिय संक्रमितके संख्या बा ।
प्रदेशमे अभिनसम १ लाख ३५ हजार २७३ जानेक स्वावके नमूना संकलन करलमे १ लाख ३० हजार २१ स्वाबके नमूना जाँच करलमे १३ हजार ९ सय ३८ स्वावके नतिजा पोजेटिभ आइल मन्त्रालय जनैले बा । ओम्ने १ लाख २१ हजार ८३ नमूना निगेटिभ ओ २ सय ५२ नमूनाके नतिजा अइना रहल जनागिल बा ।
संक्रमित मन्से १२ हजार ४७१ जाने ठिक हुके घर लौटल मन्त्रालय जनैले बा । संक्रिय संक्रमितके तथ्याङक हेरेबेर सबसे ढेर कैलालीमे ४८३, अछामे ७०, बैतडी ५०, बझाङ २३०, बाजुरा ६०, डडेल्धुरा १६२, दार्चुला ६३, डोटी १६२, कञ्चनपुर १३० ओ और जिल्लाके ४८ करके १४ सय १२ जाने रहल बटै । संक्रिय संक्रमित मन्से ९७ जाने आइसोलेसनमे, १३ सय ७ जाने होम आइसोलेसनमे ओ एक जाने आइसियूमे उपचार करैटी रहल मन्त्रालय जनैले बा ।
सुदूरपश्चिम प्रदेशमे कोभिड सक्रमित ५५ जानेक ज्यान गैल बा । शनिच्चरके रोज सेती प्रादेशिक अस्पताल धनगढीमे करल परिक्षणमे कैलालीके एक जनहनमे संक्रमण पुष्टि हुूइल बा, कलेसे कञ्चनपुरसे ३ जाने चोखाइल बटै ।
ओस्टेक पछिल्का २४ घण्टामे देशभर ठप २३२ जनहनमे कोरोना भाइरस (कोभिड–१९) के संक्रमण पुष्टि हुइल बा । देशभरके प्रयोगशालामे ३५४१ नमुना परीक्षण करेबेर ९१ महिला ओ १४१ पुरुषमे संक्रमण पुष्टि हुइल हो ।
यी संगे कुल संक्रमितके संख्या २ लाख ६९ हजार १८० पुगल बा । ओइने मन्से २ लाख ६३ हजार ७३४ जाने ठिक हुइल बटै कलेसे १९९४ जानेक मृत्यु हुइल स्वास्थ्य तथा जनसंख्या मन्त्रालय जनैले बा ।
हाल देशभर ३ हजार ४५२ सक्रिय संक्रमित बटै । उ मन्से ७७८ जाने संस्थागत आइसोलेसनमे बटै कलेसे १४७ जानेक आईसीयू ओ २६ जानेक भेन्टिलेटरमे उपचार हुइटी रहल बा ।
अँटवारसम सक्कु प्रदेशमे पुगी कोरोना खोप
कोभिड–१९ विरुद्धके खोप ‘कोभिशिल्ड’ सातु प्रदेशमे पठाई लागल बा । भारतसे अनुदानमे उपलब्ध कराइल खोप सातु प्रदेशमे पठाई लागल स्वास्थ्य तथा जनसंख्या मन्त्रालयके प्रवक्ता प्राडा जागेश्वर गौतम जानकारी डेलै ।
भारतसे नानलपाछे खोप स्वास्थ्य सेवा विभागके टेकुस्थित केन्द्रीय चिस्यान केन्दमे धारल बा । उहाँक अन्सार प्रदेशसे जिल्ला अस्पतालमे खोप आवश्यकताके आधारके वितरण करल बा । ओ अँटवारसम सक्कु प्रदेशमे खोप पुगी ।
पहिल चरणके खोप अस्पतालहे खोप केन्द्र बनाके लगाजाई । सात प्रदेश ओ ७७ जिल्लामे करके करीब ३०० अस्पतालसे खोप लगाजाई । काठमाडौं उपत्यकामे भर १० भन्दासे अस्पतालमे खोप वितरण ।
खोप स्वास्स्थ्य संस्थामे कार्यरत कोभिड–१९ व्यवस्थापनमे अग्रपङ्किंमे खटन स्वास्थ्यकर्मी, सहयोगी कर्मचारी, एम्बुलेन्स तथा शववाहन चालक, कोभिड–१९ के संक्रमणसे मृत्यु हुइल शवके व्यवस्थापनमे खटना सुरक्षाकर्मी, स्थानीय तहमे कार्यरत फोहोर व्यवस्थापन तथा सरसफाइकर्मीहे डेजाई ।
पहिल खोप लगाइल एक महिना वा चार हप्तापाछे दुसर चो लगैना डेना मन्त्रालयके प्रवक्ता डा गौतम बटैलै । खोप लगैना सुरु करल एक हप्ताभिटर सक्कु खोप लगाइ सेक्ना मन्त्रालयके तयारी बा ।
भारत सरकारसे माघ ८ गते अनुदानमे नेपालहे १० लाख केल खोप अनुदानमे उपलब्ध कराइल बा । माइनस दुई डिग्री सेल्सियससे माइनस आठ डिग्री सेल्सियसमे धारे सेक्ना कोभिशिल्ड खोप भारतमे ७० प्रतिशत प्रभावकारी डेखल बा ।
