प्रदेशसभा बैठक बोलैना तयारी
पहुरा समाचारदाता
धनगढी, १८ माघ । सुदूरपश्चिम प्रदेशसभाके अधिवेशन माघ २६ गते बलैना तयारी हुइटी रहल बा ।
प्रदेशसभाके सचिव रामसिंह धामी प्रदेशसभाके बैठक यहे माघ २६ गते बलैना अनौपचारिक जानकारी आइल बटैलै । ‘संविधानअन्सार यिहे माघभिटरे बैठक आह्वान करेसेके परना हो,’ सचिव धामी कहलै, ‘बैठक बोलैना विषयमे अभिनसम औपचारिक जानकारी भर नइआइल हो ।’
प्रतिपक्ष नेपाली कांग्रेस संसदीय दलसे गैल पुस महिनामे अधिवेशन बोलैना सरकारसंग माग करल रहे । प्रदेशसभाके बर्खे अधिवेशन (बजेट अधिवेशन) कोरोना संक्रमणके जोखिमके कारण गैल सावन ३१ गते ठोरिक दिन सञ्चालन हुके अन्त्य हुइल रहे ।
एक अधिवेशन अन्त्य हुइल छ महिनाभिटर दुसर अधिवेशन आह्वान करसेके पर्ना संवैधानिक व्यवस्था बा । कोरोनाके जोखिम अभिनफे नइटरल मने पछिल्का दिनमे स्वास्थ्य सुरक्षाके मापदण्ड अपनाके टमान बैठक, छलफल कैना क्रम बढल बा । पछिल्का दिनमे राजनैतिक दल ओ समूहके धर्ना ओ प्रदर्शन फे हुइटी रहल बा ।
प्रदेशस्तरमे प्रदेश व्यवस्थापिकाके भूमिका निर्वाह करटी रहल प्रदेशसभा जनताके सार्वभौमसत्ताके प्रयोग कैना महत्पूर्ण संस्थाफे हो । प्रदेशसभाके बैठक नम्मा समयसे बैठे नइसेक्के जनसरोकारके मुद्दा ओ समस्याके विषयमे छलफल हुई नपाइल महसुस स्वयम् प्रदेशसभाके सदस्यसे करटी बटै ।
प्रदेशसभामे प्रमुख प्रतिपक्षी दल नेपाली कांग्रेस संसदीय दलके नेता डा. रणबहादुर रावल कोरोना संक्रमितके उपचार व्यवस्थापनलगायत जनताके टमान समस्याके बारेमो छलफल जरुरी रहेलेसेफे बैठक बैठैना सरकारसे ढिलाइ हुइल बटैलै । नेपाल कम्युनिष्ट पार्टी (नेकपा) विभिजित अवस्थामे पुगेबेर अधिवेशन समयमे बोलैनामेफे ढिलाइ हुइल कतिपय प्रदेशसभा सदस्यके बुझाइ बा ।
प्रदेशसभामे सत्तापक्ष नेपाल कम्युनिष्ट पार्टी (नेकपा) के संसदीय दलके प्रमुख सचेतक तारा लामा तामाङ कहलै संविधानअन्सार सरकारसे बैठक बोलैना अपन तयारी करटी रहल बटैलै । सुदूरपश्चिम प्रदेशसभासे काम सुरु करल यिहे माघ महिनामे तीन वर्ष पूरा हुके चौठा वर्षमे प्रवेश करले बा ।
हालसम प्रदेशसभासे पारित करल टमान कानून प्रदेश प्रमुखसे प्रमाणीकरणसमेत हुसेकल बा । बनल कानूनमध्ये जनतासंग प्रत्यक्ष सरोकार रख्न कानून भर पर्याप्तरुपमे बन्न अभिन बाँकी बा ।
प्रदेशके मुख्य न्यायाधिवक्ता कुलानन्द उपाध्याय बनल कानूनमध्ये २०÷२२ ठो कानून स्थानीय तह ओ प्रदेशसभाके संरचनासंग सम्बन्धित ओ बाँकी कानून जनताके सेवासंग सम्बन्धित रहल बटैलै । उहाँ कहलै, ‘जनतासंग प्रत्यक्ष सरोकार रख्ना स्वास्थ्य, खानेपानी, खाद्य, शान्तिसुरक्षासम्बन्धी कानून तत्काल बनैना आवश्यक विल्गाइठ ।’
प्रदेशसभा सदस्य भरतबहादुर खड्का अभिनसम प्रदेशसभासे बनाइल अधिकांश ऐन कानूनके प्रभावकारी कार्यान्वयन नइहुके अन्योल सिर्जना हुइटी रहल बटैलै । प्रदेशहे डेहल अधिकारहे संकुचित पारके प्रदेशहे संघीय सरकारके इकाइजस्टे बनाइल महसुस हुइटी रहल बा, खड्का कहलै, ‘बनल ऐन विपरीत कार्यविधि बनाके विधि, पद्धति ओ प्रणाली मिच्न कामफे हुइटी रहल बा ।’
प्रदेशसभामे नेकपाके ३९, नेपाली कांग्रेसके १२ ओ साबिकके राष्ट्रिय जनता पार्टीके दुईजाने समेत ५३ जाने प्रदेशसभा सदस्य रहल बटै ।
