समानता, शिक्षा ओ रोटी

मनै मुअक ते जर्मलक नै हो, बेन जियक ते जर्मलक हो । प्याट केल पालक ते जिना त संकिर्ण व घिनलक्टीक विचार हो । ऐसिन घिन लक्टीक विचारह ठाउँ देलसे मनै उन्नतिम नाही वेन बजहन्ने परजाइ । जिना त एकथो कुकुर फे जियल रहथ । घिन लक्टीकसे घिन लक्टीक जीव फे जियल रठ । मनै नातासे मनै अस वाच परथ, कुक्राअस नाही । मनैअस जियक ते दुई बातके जरुरी बा । समानता, शिक्षा ओ रोटी ।

हमार पछगुरल दुःखी दरिद्री समाजम, शोषित समाजम किसान तथा मजदूर बर्गहन उप्कर करक लक दुई बात पुगल बात कि नाही, यी बात बिन बिनक हेर्ना जरुरी बा । रोटी के वारेम कहि एकथो किसान बहुत उब्जाइथ । एक कामम व्यस्त मनैन के नाता से ऊ भुख नै मुअ पर्ना हो । याकर ठिक उल्टा रोटीक उपयोग एक्थो किसान या मजदुर, कथ्याक कर्ति बात यह फेन जान पर्ना बात हो । खेती के बारेम एक्थो किसान धान, गहुँ ओ चाना, कोक्नी लाही आदि बहुत धेर उब्जाइथ त फे याकर ठिक उल्टा ओहिहन मारक पानी फे कहाँ पुगल बा ?

यी कैसिन अचम्मके बात हो । याकर बारेम त हम्र सक्कुजन एक घरी विचार करी ते ? तव हमन उत्तर अपनहे आ जाइ । यी कौनो अचम्मके बात नैहो, यी त हमार शोषकसे दबल रहना हमार कम्जोरी हो । याकर मुख्य कारण दबाब व अशिक्षा हो । मेहनकस जात आनक कमैया हुइथ, आल्सी मालिक बन्थ । यी उल्टा चिजह जलुकसम सपिल्टा नै बनाजाइ तलुकसम शोषण रहति समाजके सृजना कब्बु फेन नै हुइ स्याकी । औ मानवम सुखी जीवन कब्बु फे नै आइ स्याकी । परिश्रम के मिथ इज्जत नै मिल्ना जिवन ऊ जिवन नै हो, वेन मुलक हो । अस्तित्व रलक जीवन मुअल नै हो वेन जिलक हो ।

शोषक ओ जिम्दरवा अनावश्यक दबाब ले मेहनत कस जातक जीवन हन टुक्राइल बा, घिन लक्टीक वा और भटकाइल बा । यी अवस्था हन सम्झ लायक बा कि ऐसिन फझेटम परल जीवनसे वेन संघर्ष (लर्ना) मज्जा बा । जब मनै मनैनम एक्क नास व्यवहार नै हो त, इ संसारम कुुछु नै हो । वह वर्से ऐसिन जिवन नरक जैसिन बा । गोचाली हुक्र नरक उहाँ बा, जहाँ दुःख बात । यहाँ प्याटभर खाइ नै मिलठ, जहाँ सक्कुवर्से मरिचसक मुअ परथ कलसे यहाँ हो नरक । सम्झी गोचाली हुक्र यहाँ मोर नरक बा । जहाँ शिक्षाके सताहा अंधार व असामनता बा । वह ओर्से नरकसे त बेन अधिकार व कर्तव्य पाइक लाग संघर्ष कर्ना मजा बा ।

हम्र देख्ठी मीलम मजदुर हुक्र बहुत चीज तयार कर्थ त ठीक याकर उल्टा मजदुर मरिच बन्ल रथ । उब्जलक चीज पूजिपति अथवा मलिक्वनके प्याटीम आइथ । मजदुरहुक्र आपन उब्जलक चीज बेल्स नै पैत । अत्रासे कत्रा कना हो त ? वस्तक वहुत दिनसे किसान तथा श्रमिकवर्ग आनक कमैया बन्ल बैठल बात । शिक्षा वर हुक्र स्वतन्त्र नै हुइत । अस्वतन्त्रताके पिजराम विद्यादेवी कसिक आइ सेक्हीन । धनदेवीक डाट फटकारसे विद्या देवी त उहासम पुग नै सेक्थी, जहाँ एकथोर गरिब किसान बात । वह वर्से श्रमिकवर्ग जस्त रहल वस्त बात । शिक्षा व समान्ता बिना श्रमिक वर्ग अन्धारम बात । सब्से वर धन विद्याह हम्र भुल्वी कलेसे हम्र कब्बु नै उठ सेक्बी । दबल रहबी ओ फझेटम पर्ल रहबी ।

पूजिपति हुकन श्रमिक वर्ग शिक्षित हो जैही कना बहुत भारी डर बातन । काकर कलेसे शिक्षित मनै चतुर रथ । उहीह आपन अधिकार ओ कर्तव्यके ज्ञान हुइथिस । शिक्षित मनै दवाव सह नै स्याकत कना पूजीपति हुकन थाह बा । ओहवर्से हुकन दवाके अनावश्यक जंजिरम बान्ध नै सेक्बो कन डर बाटन । गरीब, किसान, शिक्षित बनहि त हुक्र धनी किसान के लर्कनह खसैना चासो करही कना डर बाटन । सद्धभर हुकनह बनावटी बनाक नै पढल गरिबह धर्म के भुल भुलैयम पर्ना हुक्र काम कर मन परैथ, अप्न सद्दभर मालिक बन्ना मन परैथ ।

वह ओर्से हम्र तरक बात नै भुली । पढी हम्र ज्ञानी बनी । दबाब हम्र हटाइ, वैज्ञानिक बनी । हम्र आब नाम कमाइ । दास प्रथा हटाइ । हम्र पुरान विचार छोरी, लौव विचार लेक आग बह्री । नै त हमन आमीन वस्तह दवावम पर परी । दास प्रथा आझुक जुगम घिनलक्टीक चलन हो । यही कौनो फेन किसान मन नै पराइत । साँस जाइ बेन दास नाइ बन्वी कना विचार लेक संसारम ह्रम आग बढवी कलसे शोषण तथा दबाब हमार समाजमसे हेराइ । तब हम्र, समना सुखी बन्बी । परिश्रमअनुसार फल हमन खोज्ना अधिकार बा । समान्ता, शिक्षा, रोटी रोजी परिश्रमअनुसार पाइक टे हम्र आखिरी साँस सम लडी ।

(गोचाली २०२८ से साभार कैगइल इ लेखके पहिलक् सिर्सक फेरबडल कैना बाहेक अन्य भासा सुढार नै कैगइल हो । व्यवस्ठा फेर गइलेसे फेन थारु भासाके पहिला पत्रिका गोचालीमे छपल रचना अभिन फेन ओट्रे समसामयिक बा । ओहेसे गोचाली २०२८ मे छपल रचना हम्रे क्रमशः प्रकासन कर्ना योजना बनैले बटि ।) –सम्पादक