स्कुल बन्दके प्रभाव
धनगढी उपमहानगरपालिकासे इहे बैशाख ५ गटे जिल्ला संकट व्यवस्थापन केन्द्र कैलालीके बैठकसे करल अनुरोध अनुसार बैशाख १५ गटेसम स्कुल बन्द कैना निर्नय करले बा । सोम्मार सामुदायिक, निजी, संस्थागत स्कुलके हेडमास्टर, शिक्षक संघ संगठनके प्रतिनिधि, प्याव्सन, एनप्याव्सनके प्रतिनिधि ओ और सरोकारवालासे सुझाव संकलन करलपाछे वैशाख १५ गतेसमहे स्कुल बन्द कैना निर्नय कैगिलक हो । प्रत्यक्ष पठनपाठन विद्यालयमे बन्द हुइलेसे फे सम्भव हुइटसम अनलाइन कक्षा संचालन कैना बारेमे स्कुलहे जानकारी करैना ओ वार्षिक परीक्षाके लाग आवश्यक गृहकार्य कैना विद्यालयहे जानकारी करैना निर्णयफे धनगढी उपमहानगरपालिका करले बा ।
अब्बे काठमाडौं लगायट देशके प्रमुख सहरमे स्कुल बन्दके खबर अइटि बा । स्थानीय पालिका अवस्थाअन्सार जब, जहिया फेन स्कुल बन्द करे सेक्ना अवस्ठा बा । मने बहुटसे स्कुल संचालक स्कुल बन्द करक अन्खनैटि बाटैं । काजेकि पुरान शैक्षिक सत्र ओराके, परीक्षा लेके डोसर शैक्षिक सत्रके मनस्थितिमै बाटैं ओइने । गैलक बरसके शैक्षिक सत्र कामचलाउ रहल । ओहेसे इ बरस मजासे परीक्षा शुल्क, भर्ना शुल्क लेहे मिले कना मनसाय स्कुल संचालकन्के बटिन् ।
स्कुल बन्द करक अन्खनैना डोसर कारन, घरे लर्का रलेसे झन बिगर जैठाँ, सकेसम स्कुल जो खडेरना हो कना अभिभावकन्के मानसिकता फे काम कर्ले बा । स्कुल बन्द करो कहिके कोनो स्कुलिम धर्ना, जुलुस गइल समाचार नैआइल हो । सरकार विग्यप्टि किल निकारके झारा टारटा । सबके चेपुवम विद्यार्थी परल बाटैं ।
मने बुझे पर्ना बाट का हो कलेसे १८ बरसके टरक किशोर, लर्कापर्कन्के लग कोरोनाके खोप नैआइल हो । सहयोगमे आइल कोरोना खोप प्रभावकारी बा कना सुखद समाचार फेन नैआइठो । मने कोरोना खोप लगुइयनके सहभागिता उत्साहजनक बा । इहे बिचेम भारत सरकार अइना मे १ (बैशाख १८) से १८ बरसके टरक लर्कापर्कन्हे कोरोना खोप लगैना जनैले बा । यडि इ खोप नेपालमे फेन हालि आके विद्यार्थी डुनु डोज लगाइ पैहि कलेसे बल्ले स्कुल सुरक्षित रहि । नै टे अब्बे स्कुल क्षेत्र जोखिमपुर्न बा । काजेकि कोरोनाके डबल भेरियन्ट अप्कि लर्कापर्का ओ युवन्मे फेन लागटा ।
हो, प्रत्यक्ष पढाइहस अनलाइन कक्षा प्रभावकारि नैहो, मने सबसे भारि लर्कापर्कनके ज्यान हो । ओहेसे स्कुल संचालन करुइयन टेंढमेंढ नैकैके अब्बे कुछ डिनके लग स्कुल बन्द कैना जो ठिक रहि । स्कुल बन्दके प्रभाव सबजहन जरुर परि । मने ज्यान बँचे, लाखो पाए कना कहकुट ना बिस्राइ । स्कुल बन्द किल नाहि आउर क्षेत्रमे फेन भिरभार कम करि ।
