हौसलपुरके भासा ज्ञान

पुरुबसे लेके पच्छिउँ टक थारु समुदायके बसोबास भारतसे जोरल सिमा नाकामे बा । ओहेसे भारत छेउछाउमे बोल्ना हिन्दी, मैथिली, भोजपुरी, अवधी लगायट भासा बोल्ना थारु जटरा सहज मानिट, ओटरा नेपाली भासा बोल्ना सहज नाइ मानिट । गाउँघरमे सिढ्रा बेंचे अइना बाजिनसे गाउँघरक जन्नि मनै जटरा सहज मानिट, ओटरा सरकारी कर्मचारीसे नेपाली भासामे सवाल जवाफ कर्ना ढक मानिट । मने पहाडसे झरल भारि समुहके कारन आब थारु समुदायहे नेपाली भासा फेन सहज हुइटि जैटि बा ।

मने कैलारी गाउँपालिका–७, हौसलपुरहस सीमावर्ती बहुट अइसिन गाउँ बा, जहाँ थारु समुदायक् मनैन् हिन्दी बोल्ना सहज बा, नेपाली नाहिं । काजेकि उहाँक् लर्कापर्कनके पह्रना स्कुल भारतमे लग्गे बा । आपन ठाँउमे कौनो स्कुल नैरहल ओ डगराके समस्याके कारन उ गाउँक सक्कु लर्कापर्का भारतके स्कुलिम कैना बाध्य बाटै । छिमेकी हिन्दी बोलुइयन बाटैं । ओइने अपन देशके नाहि भारतके राष्ट्रिय गान गैनामे अभ्यस्त बाटैं ।

इहे बिच अब्बे हौसलपुरवासी फेन नेपाली भासा सिख्टि बाटै । अपने देश ओ नेपालीपनसे कुछ डुर मने, भारतीयपनसे लग्गे ओइनहे नेपाली हुइल महसुस कराइक लाग ओ सेवा सुविधामे सहजताके लाग कैलारी गाउँपालिकाके कार्यालयसे नेपाली भासाके प्रशिक्षण डे जैटि बा ।

नेपालमे बैठुइया सब नेपाली हुइट । ओइन देशके राष्ट्रिय भासा नेपाली सिखाइक चाहि कना सरकारके ध्यान जैना स्वाभाविक हो । मने कौनो फेन जाति, भासिन ओइनेके मातृभासामे फेन पोख्त बनैना ओटरे जरुरि बा । हौसलपुरवासी सक्कु थारु जाति रलेसे फेन बोलीचालीमे हिन्दी लवज बा । स्थानीयहे नेपाली भासाके ज्ञान नैरहल कारन योजना कार्यान्वयनमे समस्या हुइलपाछे हौसलपुरमे नेपाली भासा सिखाई कार्यक्रम सञ्चालन करल कैलारी गाउँपालिकाके कार्यालय जनैले बा । उ वडाके अध्यक्ष कमलप्रसाद चौधरीके अन्सार हौसलपुरवासी नेपाली भासा नैबुझके ओ नैबोले जानके बैंकसहित सरकारी कार्यालयमे कामकाज कराइक लाग ओइन समस्या हुइल कारन फे नेपाली भासाके कक्षा चलागैलक हो ।

भासा सिखैना अभियान टे पलि बा । ओकर साथ साथ थरुहट क्षेत्रके बंैक होए या अन्य सरकारी कार्यालय उहाँ थारु हेल्प डेस्क हुइक चाहि कना बाट हौसलपुरके उडाहरन डेखाइठ ।

कैलारी गाउँपालिकाके कार्यालयसे आब हौसलपुरवासीन नेपालीके साथसाथे थारु भासा सिखैना फेन ओटरे जरुरि बा । अपन मातृभासा बल्गर रलेसे चाहे जौन भासा फेन ग्रहन कर्ना सजिल हुइठ कना बाट सम्बन्धित निकाय बुझक चाहि । भासा ज्ञान संरक्षणमे हमार ध्यान नेपाली भासाके परवरिस सँगसँगे अपने मातृभासा बह्रैना पौंहै्रना ओर फेन जाइक चाहि ।