थारू कलाकार एकजुटके सन्देश
मेरमेरिक पेशा, व्यवसायमे लागल पेशाकर्मीन् एकुजट हुइना समयके माग हो । इहे क्रममे ११ बैशाखमे श्यामकुमार रानाके घरगोस्याइमे रानाथारू कलाकार समाज गठन करगिल खबर बा । इहिसे पहिले राना कला संस्कृति संरक्षण तथा विकास मञ्च फेन गठन हो सेकल रहे, ओकरे संयोजनमे कार्यक्रम हुइल रहे ।
अपन भासा, कला, संस्कृति जोगैना युवन्के कर्तव्य हो । इ बिचेम भासा, कला, संस्कृति जोगैना कलाकारन्के फेन बरा जिम्मेवारि बा । आज्कल गिट सुन्ना संगसंगे हेर्ना मेरिक आइल बा । ओहेसे गिटके भिडियो बनैना बहुट खर्चहा हुइल बा । एकजुट होके सामुहिक ढंगसे गैलेसे मजा काम हुइना ओ दामाशाहीले खर्च फेन कम लग्ना डेखाइठ ।
रानाथारु समुदाय समग्र थारु समुदायसे छुटल पाछे मेरमेरिक संगठन बनैटि बा । उहे क्रममे रानाथारू कलाकार समाज गठन हुइल डेखाइल बा । कैलाली ओ कञ्चनपुरके ६० जाने कलाकारनके उपस्थितिमे हुइल कार्यक्रमसे रानाथारू कलाकार एकजुट होके काम कैना प्रतिबद्धता जना गइल बा । इहिसे पहिले राष्ट्रिय थारु कलाकार मञ्च २०७५ सालमे काठमाडौंमे गठन हुइल बा । मञ्चके थरुहटके बहुट जिल्लामे शाखा फेन गठन हो सेकल बा । मञ्चके आबक् अध्यक्ष कञ्चनपुरके विनय वैद्य बाटैं । ओहेसे राष्ट्रिय थारु कलाकार मञ्च ओ भर्खर गठन हुइल रानाथारू कलाकार समाज मिल्के ढेर सिर्जनात्मक काम करे सेक्जाइठ ।
भासाके लवज कलाकारन् छुट्यइलेसे फेन संगिटके भासा अक्के रहठ । एक डोसर जे आनक भासा नैबुझ्लेसे फेन संगिटके भासा बुझ्ठैं । डंगौरा थारुसे घुलमिल कैके बैठल ओर्से रानाथारुके कला संस्कृति फे कुछ कुछ फ्युजन हुइटि बा । ओहेसे अपन मौलिकता जोगाइक लग, सामुहिक ढंगसे आगे बह्रक लग रानाथारू कलाकार समाज गठन हुइना सवल पक्ष हो । व्यवस्थित योजना बनाके टिम आगे बह्रे सेके ।
