देश फे उँटमुटावन अवस्थामे

काठमाडौं उपत्यकामे इहे वैशाख १६ से १५ डिनके लग लकडाउन हुइटि बा । इहिसे पहिले बाँके, बर्दियामे लकडाउन हो सेकल । सुर्खेत लगायत ९ जिल्लामे लकडाउन कैना निर्नय हो सेकल । कोरोनाके महामारी मुँह बा के बैठल बा । महामारी मनैन् डिन डुगुना राट चौगुना लिल्टि बा । इहे अवस्था रहि कलेसे देशभर लकडाउन हुइना अवस्था बा । ओस्हे फेन संघीय राजधानी काठमाडौं लकडाउन हुइना कलक आधा देश ठप्प हुइना बराबर हो ।

नेपाली जनता गैलक बरसके लकडाउनके साँसट नै बिस्रैले हुइट । उ साँसट फेन डोस्रे डोह्रेइना अवस्था आ सेकल । काजेकि कौनो मेरिक सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, स्विमिङ पुल, सपिङ मल, मनोरञ्जनस्थल, सैलुन, ब्युटी पार्लर, जिमखाना, समुहमे खेलजैना खेल, पुस्तकालय, संग्रहालय, चिडियाखाना सञ्चालन करे पैना नैहो काठमाडौं उपत्यकामे । स्कुल इहिसे पहिले बन्ड हो सेकल । लेटि रलक परिच्छा रुक सेकल ।

काठमाडौंमे वैशाखसम सार्वजनिक ओ निजी सवारी साधन फे चले नैपैना हो । खाद्य सामग्री, औषधि पसल व्यवसाय बाहेकके अन्य व्यावसाय हाल बन्ड कर्ना ओ खाद्य सामग्री पसल बिहान १० बजेसम ओ साँझ ५ बजेसे ७ बजेसम सरकार टोकल स्वास्थ्य मापदण्ड पालना कैके खोले मिल्ना बा । काठमाडौं उपत्यका छिरुइयन अनिवार्य रुपमे स्थानीय तह टोकल क्वारेन्टिन या होम आइसोलेसनमे बैठे पर्ना बा । इहिसे जरुरि कामले आब काठमाडौं छिरना फे साँसट बा ।

इहिले पहिलक् लकडाउनमे टमान जान अपन पेशा, व्यवसाय बडल्ना बाध्य हुइल रहैं । अब्बे फे उहे हाल हुइटा । जरुरि कामले किल घर बाहेर निकर्ना, मास्क अनिवार्य लगैना, सेनिटाइजर बेल्सना, खानपानमे ध्यान डेना लगायट सचेटना अप्नाके इ महामारीसे लरना टे पर्लि बा । बचतमे फे ध्यान डेहे पर्ना अवस्था बा । काजेकि देश ठप्प हुइल बेला कैटि रलक काम रुक जाइठ, मने पेट दानपानी माँगल करठ । ओहेसे स्वास्थके लग सचेटना अपनैना संगसंगे वचतमे फेन ध्यान डि । काजेकि उँटमुटावन अवस्थामे परल देश कब करोट फेरठ पटा नाइ हो ।