टीकापुर नगरपालिकाके नवौं नगरसभा स्थगित

पहुरा समाचारदाता
कैलाली, १७ असार । कैलालीके टीकापुर नगरपालिकाके नवौं नगरसभा वडा विभाजनमे सहमति जुटे नैसेकलपाछे बिफेक रोज पुनः स्थगित हुइल बा । नगरसभा असार १९ गते १ बजेसमके लाग स्थगित हुइल सदस्य सचिव मोहन अर्याल जानकारी डेलै ।

असार ६ गते सुरु हुइल नगरसभा इहीसे आघे १० गते समेत स्थगित हुइल रहे । बिफेक रोज बैठल कार्यपालिका बैठकसे वडा विभाजनके विषयमे सहमति जुटाइ नैसेकलपाछे नगरसभा स्थगित कैना निर्णय करल हो । नगरसभासे वडा विभाजन बाहेकके अन्य सक्कु प्रस्ताव पारित करसेकल सदस्य सचिव अर्याल जानकारी डेलै ।

वडा विभाजनके प्रस्तावमे फरक मत रख्टी आइल वडाध्यक्ष रामलाल डगौरा थारु नगरसभामे आपन ओरसे समेत प्रस्ताव लैजैना तयारी हुइटी रहल बटैलै । उहाँ दुई प्रस्ताव उपर नगरसभामे छलफल कैना मेरके सहमतिके प्रयास हुइटी रहल जानकारी डेलै । नगरपालिकाके प्रवक्ता दीर्घ ठकुल्ला वडा विभाजनके विषयमे आभिन फेन सहमतिके प्रयास हुइटी रहल बटैलै । उहाँ कार्यपालिका बैठकमे छलफल हुइटी रहल ओ फेनसे राजनीतिक दलसे पुनः छलफल कैना जानकारी डेलै ।

टीकापुर नगरपालिकामे हाल नौ वडा रहल बावै । जनसंख्याके हिसाबसे वडा नं.१ नेपालके सबसे बरवार वडा मानजाइठ् । यहाँ ५० हजारसे ढिउर जनसंख्या रहल बा । नगरपालिकासे राजनीतिक दलसे डेहल सुझाव अनुसार वडा नं.१ हे ५ ओ वडा नं. २ हे २ ठो वडामे विभाजन कैना मेरके तयारी करल बा । वडाध्यक्ष थारु लगायतके कुछ वडा नं. १ हे ६ ठो वडा बनाइ पर्ना दावी करटी रहल बाटै । नगरसभामे वडा विभाजनके प्रस्ताव पेश हुइलेसे वडाध्यक्ष थारुके पक्षमे दुईतिहाई जुट्ना सम्भावना रहल स्रोतके दावी रहल बा । नगरसभामे ४९ जाने सदस्य रहल बाटै ।

उहाँके दावीमे वडा नं. १ वनगाउँके बासिन्दा समेत साथ डेले बाटै । उहाँहुक्रे बुधके वडा नं. १ हे ६ वडामे विभाजन कैना माग करटी मेयर तपेन्द्रबहादुर रावलहे ज्ञापन पत्र बुझैले बाटै । उहाँहुक्रे कुछ समय नगरपालिका कार्यालयमे तालाबन्दी समेत करल रहिट । उहाँहुक्रे थारु समुदायहे अल्पमतमे पर्ना मेरके नगरपालिकासे वडा विभाजनके तयारी करल आरोप लगैले बाटै ।