निषेधाज्ञा अवधिके यातायात करमे छुट

पहुरा समाचारदाता
धनगढी, २१ असार । सुदूरपश्चिम सरकारसे निषेधाज्ञा अवधिके यातायात करमे छुट कैना निर्णय करले बा ।

प्रदेश सरकारसे यातायात व्यवस्था कार्यालय ओ सेवा कार्यालयमे हुइना दर्ता ओ नवीकरणमे जरिमाना छुट कैना निर्णय करले बा । यातायात व्यवस्था कार्यालय कैलाली, कञ्चनपुर, सेवा कार्यालय डोटी ओ डडेल्धुरामे हुइना दर्ता ओ नवीकरणमे छुट डेना निर्णय हुइल हो ।

आर्थिक मामिला मन्त्रालयके मन्त्रीस्तरीय बैठकसे उ निर्णय हुइल हो । निषेधाज्ञाके समयमे कर बुझैना अवधि पुगल सवारी धनीहुक्रनहे सवारी साधन पूर्णरुपमे खुलल १५ दिनभित्रे कर बुझाइबर जरिमाना छुट कैना निर्णय हुइल मन्त्रालयके शाखा अधिकृत खगेन्द्र साउँदसे जारी पत्रमे उल्लेख बा ।