धनगढी वडा नम्बर ८ के कार्यालय उद्घाटन

पहुरा समाचारदाता
धनगढी, २२ असार । धनगढी उपमहानगरपालिका वडा नम्बर ८ के कार्यालय उद्घाटन करल बा । भाडाके घरमे कार्य सम्पादन करटि आइल वडा नम्बर ८ सोम्मार अपन कार्यालय उद्घाटन करल हो ।

धनगढी उपमहानगरके प्रमुख नृपबहादुर वड ओ उपप्रमुख सुशीला मिश्र भट्ट वडा कार्यालयके संयुक्त रुपमे उद्घाटन करले रहैं । धनगढी नगरके प्रमुख नृपबहादुर वड विकास निर्माणके कार्य तिव्र रुपमे आघे बह्रल बटैलैं । उहाँ अप्ने निर्वाचित हुसेकलपाछे वडा कार्यालय सम्झौता अनुसार निर्माण कार्य कुछ सम्पन्न हुइल ओ कुछके हुइटिरहल बटैलैं ।

कर्मचारी ओ सेवाग्राहीके लाग कुछ कार्यालय निर्माण हुसेकल बा, कुछ निर्माणाधिन अवस्थामे बा, नगर प्रमुख वड बलैं, ‘बाँकी वडाके वडा कार्यालय भवन फेन निर्माण कार्य अपन कार्यकाल भित्रे सम्पन्न हुइ ।’ वडा कार्यालय व्यवस्थित नैहुइटसम वडा तहके कार्य सम्पादन व्यवस्थित हुइ नैसेकी नगरप्रमुख वड बलैं, ‘ टबेमारे पूर्वाधार निर्माण प्राथमिकतामे परल हो ।’

वडा कार्यालय निर्माणहे उपमहानगरपालिकासे प्राथमिकतामे ढरल नगरप्रमुख वड बटैलैं । अपन कार्यालयमे बैठ्ना ओ अपने कार्यालयसे कार्य सम्पादन करल पाइल कटि वडाअध्यक्ष नारायण बराल खुसी व्यक्त करले बटैं ।

वडा नम्बर ८ के वडा कार्यालयमे ८ ठोसम कोठा, महिला तथा बालबालिका मैत्री, भूकम्परहित, महिला÷पुरुष शौचालय, रिसेप्सन, किचन ओ अपांगमैत्री बा । निर्माण हुइल वडा कार्यालयके भवन ५ तलासम रोके सेक्ना नक्सा पास करल उपमहानगरपालिका जनैले बा । ९१ लाख १३ हजार २ सय ८४ रुपैयाँके लगानीमे कार्यालय निर्माण हुइल हो ।