हमालसे निःशुल्क ‘महाप्रस्थान यान’ सञ्चालन
धनगढी, २५ असार । धनगढीके अभियन्ता तथा व्यवसायी गोपाल हमाल निःशुल्क महाप्रस्थान यान सञ्चालनमे नन्ले बटैं । मृत्युपाछे घरसे आर्यघाटसमके यात्रा सहज होए कना उद्देश्यके साथ निःशुल्क महाप्रस्थान यान सञ्चालनमे नानल हमााल बटैलैं ।
शुकके रोज धनगढीमे एक कार्यक्रमके बीच महाप्रस्थान यान निःशुल्क रूपमे सञ्चालनके लाग हस्तान्तरण करल बा । शिक्षाप्रेमी प्रा. डा. हेमराज पन्त ओ हमाल परिवार महाप्रस्थान यान सञ्चालनके जिम्मेवारी पाइल धनगढीके सामाजिक व्यक्तित्व सिद्धराज पनेरुहे यानके चाभी हस्तान्तरण करलैं ।
हमाल पार्थिव शरीरहे सम्मानसहित दाहसंस्कारके लाग लैजिना उ यानके व्यवस्था करल बटैलैं । व्यवसायी हमालके अनुसार महाप्रस्थान यान सञ्चालनके लाग ३० लाख लगानी लागल बा ।
कार्यक्रममे हमाल कलैं, ‘शव वाहन पैना एकडम मुस्किल बा । शव यात्राके लाग अधिकांश गाडी डेहे नैमन्ना समस्या फेन बा । कौनो फेन परिवारके सदस्य गुमाके परिवार शोकमे रहठ । अइसिन अवस्थामे शुल्क तिरके फेन शव वाहन पैना मुस्किल रहठ । टबेमारे महाप्रस्थान यानके नाम डेके निःशुल्क वाहन सञ्चालन करल हो ।’
यान हस्तान्तरण कार्यक्रममे शिक्षाप्रेमी तथा सुदूरपश्चिमाञ्चल विश्वविद्यालयके पूर्वरजिष्ट्रार डा. हेमराज पन्त सम्मानजनक अन्तिम संस्कारके लाग अभियन्ता हमाल महाप्रस्थान यान सञ्चालन करके महत्वपूर्ण काम करलमे प्रशंसा करलैं ।
यानभित्तर पार्थिव शरीर ओ किरियापुत्र बैठे मिल्ना छुट्टेछुट्टे क्याबिन बा । साथे यानके आघेक भागमे फूलमालासहित मृतकके फोटु ढरना ठाउँ बा । यान धनगढी उपमहानगरपालिकास्थित मोहना लडिया आर्यघाट, गोदावरी लडिया आर्यघाट, खुटिया, कञ्चनपुरके महाकाली आर्यघाटसम सञ्चालन हुइना मेरिक लानल हो ।
नेपाल उद्योग वाणिज्य महासंघके पूर्व केन्द्रीय सदस्य समेत रहल हमाल धनगढीमे सामाजिक क्षेत्रमे टमान काम करटि आइल बटैं । यान सञ्चालनके लाग एक चालकके समेत व्यवस्था करल बा । निःशुल्क यान सञ्चालन करेक लाग सम्पर्क व्यक्तिके रूपमे कैलाली उद्योग वाणिज्य संघके सचिव सिद्धराज पनेरुहे तोकल बा ओ सञ्चालन खर्च हमाल परिवार व्यहोरि ।
