यातायात व्यवसायीके ७ बुँदे माग
पहुरा समाचारदाता
धनगढी, २७ असार । सुदूरपश्चिम प्रदेशके यातायात व्यवसायीसे सरकार ओ बैँक तथा वित्तीय संघसंस्थासंग ७ बुँदे माग आघे सरले बटै । कञ्चनपुरमे बैठल यातायात व्यवसायीके प्रदेशस्तरीय भेलासे महाकाली यातायात प्रालिके अध्यक्ष डम्बर पन्तके संयोजकत्वमे संघर्ष समिति गठन समेत करले बा ।
ओइने यातायात व्यवसायी ओ मजदुरहे कोरोनाके खोप लगाई पर्ना, निजी सवारी साधनहे यात्रु बोक्न रोक लगाई पर्ना, २०७६ चैत ११ गतेसे लकडाउन अवधीभरके व्याज पूर्ण रुपमे छुट ओ सावामे ५ से ७ प्रतिशतसम व्याज कायम कराई पर्ना ओइने माग रख्ले बटै ।
व्यवसायीसे सार्वजनिक यातायातके भाडा बढाई पर्ना, लकडाउन खुलल कम्तीमे ६ महिनापाछे केल बैँकके किस्ता सञ्चालन करे पर्ना, बिमा, यातायात कर, रुट परमिट, ब्लुबुक नविकरणमे पूर्ण छुट करे पर्ना माग फे राखल सुन्दर सुदूरपश्चिम यातायात प्रालिके अध्यक्ष पदम सापकोटा बटैलै ।
सम्बन्धित प्रालिके सिफारिसमे रुट परमिट, जाँचपास नवीकरण कैना व्यवस्था मिलाई पर्ना ओ नम्मा दुरीके रुट परमिट ओ जाँचपास सम्बन्धित प्रदेशमे नवीकरण कराई पर्ना व्यवस्था कराई पर्ना मागफे व्यवसायीहुक्रे करले बटै ।
सापकोटासे प्रदेशभर सञ्चालनमे रहल १८ मध्ये १५ ठो यातायात प्रालिके प्रदेशस्तरीय भेलासे आघे सारल माग पूरा कैना प्रदेश सरकार, प्रदेश प्रमुख, जिल्ला प्रशासन कार्यालय, नेपाल राष्ट्र बैँकहे अँटवारसे ज्ञापनपत्र बुझैना बटैलै ।
