दिपेन्द्र माविके ४ कोठ भवन उद्घाटन
पहुरा समाचारदाता
धनगढी, ३१ असार । कैलारी गाउँपालिका वडा नम्बर १ हसुलियास्थित दिपेन्द्र माविके ४ कोठ भवन, कम्प्युटर प्रयोगशाला, विज्ञान प्रयोगशाला तथा पुस्तकालयके उद्घाटन हुइल बा ।
कैलाली जिल्ला निर्वाचन नम्बर ३(१) के प्रदेश सभा सदस्य वीरमान चौधरी बुधके एक कार्यक्रमके बीच ४ कोठे उ भवनके उद्घाटन करलैं । कार्यक्रममे प्रदेश सभा सदस्य चौधरी विद्यालयके शैक्षिक तथा भौतिक प्रगतिके लाग आवश्यक पूर्वाधार उपलब्ध करैना अपन सेक्ना सहयोग करना प्रतिवद्धता व्यक्त करलैं ।
कार्यक्रममे कैलारी गाउँपालिकाके अध्यक्ष लाजुराम चौधरी कम्प्युटर प्रयोगशालाके उद्घाटन करटि विद्यालयके वर्तमान प्रगतिके प्रशंसा करटि भविष्यमे अन्य नमुना विद्यालयके दाँजोमे यी विद्यालय और मजा गुणस्तर कायम करि कना विश्वास व्यक्त करले रहैं ।
अस्टेक, विद्यालयके लावा विज्ञान प्रयोगशालाके उद्घाटन गाउँपालिकाके उपाध्यक्ष लक्ष्मी सत्गौंवा करलेरहि कलेसे पुस्तकालयके उद्घाटन वडा नम्बर १ के वडाध्यक्ष बालकृष्ण डंगौरा थारु करले रहैं ।
विद्यालय व्यवस्थापन समिति अध्यक्ष वीरप्रसाद चौधरीके अध्यक्षतामे हुइल कार्यक्रममे विद्यालयके प्रअ विनोद भट्टराई अपन कार्यकालमे हुइल उल्लेख्य कार्यके समीक्षा करले रहैं ।
विद्यालयके +२ संयोजक प्रेमराज पन्त स्वागत करल कार्यक्रमके सञ्चालन शिक्षक नारायण ढकाल करले रहैं ।
