एमाले प्रधानमन्त्री देउवाहे विश्वासके मत नैडेना
काठमाडौं, १ सावन । नेकपा एमाल प्रधानमन्त्री शेरबहादुर देउवाहे विश्वासके मत नैडेना निर्णय करले बा । आज (शुकके) तुलसीलाल स्मृति प्रतिष्ठान भवन च्यासलमे बैठल स्थायी कमिटी बैठकसे देउवाहे विश्वासके मत नैडेना निर्णय करल प्रवक्ता प्रदीप ज्ञवाली जानकारी डेलैं । पार्टीके यी निर्णय मन्ना सांसदहुकनहे निर्देशन फेन बैठक डेले बा ।
‘आब नेकपा एमाले देश ओ राष्ट्रियताके पहरेदार, लोकतन्त्र ओ संविधानके रक्षक, जनताके हितप्रति अटल रहिके सक्रिय ओ रचनात्मक प्रतिपक्षके भूमिका खेली,’ प्रवक्ता ज्ञवाली कलैं, ‘अलोकतान्त्रिक एवं अस्वस्थ विधिसे गठन सरकारहे पार्टीके समर्थन नैरहि ओ विश्वासके मत नैडेना स्पष्ट परटि पार्टीके प्रतिनिधिसभा सदस्यहुकनहे पार्टीके निर्णय मन्ना निर्देशन डेहल बा ।’
अस्टेक, पार्टीके समाधान करना गठित दस सदस्यीय कार्यदलसे करल दसबुँदे सहमति स्थायी कमिटी बैठक अनुमोदन करले बा । ज्ञवालीके अनुसार सहमति अनुमोदन हुइलसँगे कार्यदल विघटन हुइल बा ।
