विद्यार्थीहुकनहे स्व–अध्ययन सामग्री वितरण
पहुरा समाचारदाता
मसुरिया, ३ सावन । बाल कल्याण संघ कैलाली १ हजार ५ सय २४ जाने विद्यार्थीहुकनहे स्व–अध्ययन सामग्री वितरण करले बा ।
विद्यालय बन्द रहल अवस्थामे बालबालिकाहे अध्ययनमे सहयोग पुगे कहिके वल्र्डभिजनके आर्थिक सहयोगमे संघसे स्व–अध्ययन सामग्री वितरण करल हो ।
संघसे कैलालीके ५ स्थानीय तह टीकापुर, भजनी, घोडाघोडी, गौरगंगा नगरपालिका ओ कैलारी गाउँपालिकाहे उ सामग्री वितरण करले बा । संघ टीकपुर नगरपालिकाके कक्षा १–५ समके २५०, भजनी नगरपालिकाके ४९९, घोडाघोडी नगरपालिकाके ६३३ जाने, गौरगंगा नगरपालिका वडा १० ओ ११ मे ४४५ ओ कैलारी गाउँपालिकाके बालविकाससे कक्षा ३ समके १४२ जाने बालबालिकाहुकनहे स्व–अध्ययन सामग्री वितरण करले बा ।
बाल कल्याण संघ टीकापुरके कार्यक्रम व्यवस्थापक सुगम रेग्मीके संघ १ हजार ५ सय २४ बालबालिकाहे उ सामग्री वितरण करले बा ।
कोरोना महामारीसे विद्यालय बन्द रहल ओरसे बालबालिकामे पह्रना बानी बैठैना ओ सिकाईके विकास तथा निरन्तरता रहे कना उद्देश्यसे स्व–अध्ययन सामग्री वितरण करल व्यवस्थापक रेग्मी बटैलैं ।
बाल विकाससे कक्षा ५ समके विद्यार्थीहुकनहे पुस्तक, कापीकलम, ईरेजर ओ कलर पेन्सिल उपलब्ध कराइल बा । यिहिनहे विद्यार्थीहुकनहे घरे रहल अवस्थामे फेन पह्रना बानी विकास हुइना अपेक्षा संस्था करले बा ।
