प्रधानमन्त्री देउवा संसद्मे विश्वासके मत प्राप्त
काठमाडौं, ४ सावन । प्रधानमन्त्री शेरबहादुर देउवा विश्वासके मत प्राप्त करले बटैं । प्रतिनिधिसभाके अँट्वार बैठल दोसर बैठकमे देउवासे ढरल विश्वासके मतके पक्षमे बहुमत परल सभामुख अग्नि सापकोटा घोषणा कलैं ।
देउवाके प्रस्तावके पक्षमे १६५ मत परल बा कलेसे विपक्षमे ८३ जाने मतदान करले बटैं । मत नैडेम कना पक्षमे १ मत परल बा ।
सभामुख सापकोटाके अनुसार मतदानमे २४९ उपस्थित हुइल रहैं । प्रधानमन्त्री देउवाहे काँग्रेस, माओवादी केन्द्र, जसपा, एमाले वरिष्ठ नेता माधवकुमार नेपाल ओ जनमोर्चाके सांसदहुक्रे मत डेलैं । अस्टेक एमाले अध्यक्ष केपी शर्मा ओली पक्षके कुछ सांसद समेत देउवाहे मत डेले बटैं ।
विघटनविरुद्धके रिटमे सर्वोच्च अदालत असार २८ गते प्रतिनिधिसभा पुनःस्थापना ओ काँग्रेस सभापति शेरबहादुर देउवाहे प्रधानमन्त्री बनैना परमादेश जारी करले रहे । देउवा २९ असारमे प्रधानमन्त्रीमे नियुक्त हुइल रहिट । नियुक्त हुइल एक महिनाभित्तर संसद्मे विश्वासके मत लेहेपरना प्रावधानअनुसार देउवा अँट्वार विश्वासके मत लेनैं ।
