शिक्षा मन्त्रालयसे रद्द करल सञ्चालन अनुमति सर्वोच्चसे खारेज
पहुरा समाचारदाता
धनगढी, ३ सावन । धनगढीस्थित वस्टर्न इन्टरनेसनल विजनेस स्कुलसे डेहल रिटउप्पर फैसला करटि सर्वोच्च अदालत स्कूलहे पठनपाठन सुरु करना पत्र पठैले बा ।
शिक्षा, विज्ञान तथा प्रविधि मन्त्रालय स्कुलहे नविकरण शुल्क नैतिरल कटि २०७६ चैत ०४ गतेक मन्त्री परिषद्के बैठकसे सञ्चालन अनुमति रद्द करले रहे ।
मन्त्रालयसे सञ्चालन अनुमति रद्द करलपाछे स्कुलके ओरसे राजकुमार सिंहसे डेहल रिटके फैसला करटि सर्वोच्च अदालत पठानपाठन सुरु करना अनुमति पत्र पठैले बा ।
स्कूलसे २०७६/०७७ सम नविकरण शुल्क तिरलेसे फेन मन्त्रालयसे सञ्चालन अनुमति रद्द करे खोजल करल कटि स्कुलके प्रबन्ध निर्देशक शैलेन्द्र सिंह सर्वोच्च अदालत मन्त्रालयसे रद्द करल सञ्चालन अनुमति खारेज करल अँट्वर पत्रकार सम्मेलन करके जानकारी डेलैं । उहाँ कलैं— मन्त्रलयसे स्कुलके संचालन अनुमति रद्द करलओरसे पठनपाठनमे समस्या हुइल हो । आब निरन्तररुपमे पह्राइ सुरु हुइ ।
अमेरिकाके डेल्टा यूनिभरसिटीसे सम्बन्ध प्राप्त वस्र्टन इन्टरनेशनल विजनेश स्कुल सञ्चालन अनुमति शिक्षा, विज्ञान तथा प्रविधि मन्त्रालय रद्द करलपाछे पठानपाठन समस्या हुइल रहे । सर्वोच्चके फैसलापाछे भर्ना अभियान सुरु करल प्रबन्ध निर्देशक सिंह बटैलैं । उहाँ कलैं— विद्यार्थीके भविष्यउप्पर खेलवाड करटि मन्त्रालय सञ्चालन अनुमति खारेज करले रहे । मने वरिष्ठ अधिवक्ता सुरेन्द्रकुमार खड्काके एकल इजलाससे मन्त्रालय रद्द करल सञ्चालन अनुमति खारेज करलसंगे पठनपाठन सुरु करना पत्र पठैले बा ।
अँट्वार पत्रकार सम्मेलन करटि प्रबन्ध निर्देशक डा. शैलेन्द्रप्रकाश सिंह सावन ३ गतेसे भर्ना अभियान सुरु करल बटैलैं । उहाँ कलैं— असारसे भर्ना अभियान सुरु हुइपरनामे मन्त्रालयके एकलौटी निर्णयसे समस्या हुइल, सर्वोच्च अदालतसे निर्णय खारेज करना अन्तरिम आदेश जारी करलेसे फेन हम्रे शिक्षा मन्त्रालयके सञ्चालन अनुमतीपत्र अनुसार भर्ना अभियान सुरु करले बटि ।
‘सुदूरपश्चिमके जनताके छावाछाईहुक्रे अपन घरेक मानामुठा खाके अपन ठाउँमे व्यवसायिक शिक्षा हाँिसल करे सेकिट कना उद्देश्यसे स्कूल सञ्चालनमे नानल हो,’ वेस्टर्न इन्टरनेसनल विजनेस स्कुलके प्रवन्ध निर्देशक डा. शैलेन्द्र सिंह कलैं, ‘हम्रे व्यवसायिक शिक्षा प्रदान करना मामिलामे दृढ संकल्पित हुके लागल बटि ।’
