कक्षा १२ के परीक्षा सावन मसान्तसे

काठमाडौं, ५ सावन । कोरोना (कोभिड–१९) भाइरस संक्रमणके कारण स्थगित कक्षा १२ के अन्तिम वार्षिक परीक्षा सावन मसान्तसे सुरु करना हुइल बा । विद्यार्थीके भौतिक उपस्थितिमे परीक्षा सञ्चालन हुइना ओ विगतके जस्टे १ सय पूर्णांकके लिखित परीक्षा लेना हुइल बा ।

राष्ट्रिय परीक्षा बोर्डके अध्यक्ष प्रा. डा. चन्द्रमणि पौडेल कोभिड–१९ संकट व्यवस्थापन केन्द्र (सीसीएमसी) विद्यार्थीके भौतिक उपस्थितिमे कक्षा १२ के परीक्षा करना अनुमति डेहल जानकारी डेटि सावनके अन्तिमसे परीक्षा सुरु करना योजना रहल बटैलैं । यीआघे बोर्ड विद्यार्थीके भौतिक उपस्थितिमे परीक्षा सञ्चालन करना (सीसीएमसी)सँग अनुमति मग्ले रहे । आब एक–दुई दिनभित्रे बोर्डके बैठक बैठके परीक्षाके बारेमे कार्यतालिका सार्वजनिक करना जनाइल बा ।

एक सय पूर्णांकके परीक्षा

यीबीच बोर्ड यीबेर एक सय पूर्णांकके परीक्षा सञ्चालन करना हुइल बा । गैल वर्ष कोरोना भाइरसके कारण कक्षा १२ मे अध्ययन करुल विद्यार्थी जम्मा ४० पूर्णांकके परीक्षा लेहल रहे । बोर्डके यी मेरिक तयारीपाछे आब कक्षा १२ के विद्यार्थी तीन घण्टाके परीक्षा डेहेपरि ।

कक्षा १२ मे अध्ययन करुइया विद्यार्थी उच्च शिक्षामे प्रवेश करना ओ विदेशी विश्वविद्यालयमे अध्ययनके लाग समेत जैना हुइल ओरसे गुणस्तरमे कमी करना नैहुइना ओरसे लिखित परीक्षा लेना निचोडमे पुगल बा ।