बझाङमे टेलिफोन ओ इन्टरनेट सेवा अवरूद्ध
बझाङ, ५ सावन । विगत कुछ दिनसे लगातार परल वर्षाके कारण घाम नैलाग्के बझाङके टेलिफोन टावरमे रहल सोलारमे चार्ज ओराके टेलिफोन सेवा अवरुद्ध हुइल बा ।
सोलारके विकल्पमे जेनेरेटर रहल स्थान सदरमुकाम चैनपुर ओ बाताके टावरसे टेलिफोन सेवा सञ्चालन रहलेसे फेन बझाङके अन्य २० ठो से ढेर टेलिफोन टावरसे विस्तार करल नेटवर्कके सोलारमे चार्ज नैहुइलपाछे अवरुद्ध हुइल बा ।
खप्तड छान्ना गाउँपालिकालगायत उ आसपासके क्षेत्रहे लक्षित करके चौका ओ गडरायके डाँडामे टेलिकमके टावर रलेसे फेन उहाँ जडान करल सोलार कुछ दिनयहोर चार्ज नैहुके उ क्षेत्रमे एक सातासे टेलिफोन सेवा अवरुद्ध हुइल बा ।
खप्तड छान्ना गाउँपालिका–४ के ईश्वर रोकाया कलैं, ‘कुछ दिनसे यी क्षेत्रके सब ठाउँमे टेलिफोन ओ इन्टरनेट सेवा अवरुद्ध हुइल ओरसे टेलिफोन करना समस्या हुइल बा ।’
खप्तड छान्ना जस्टे बित्थडचिर गाउँपालिकालगायत बुङंगल नगरपालिका, सुर्मा, मष्टा, तल्कोट, साइपाल, दुर्गाथली ओ छबीस पाथिभेरा गाउँपालिकामे फेन टेलिफोन सेवा पूर्णरूपसे विच्छेद हुइल बा ।
टेलिफोन तथा इन्टरनेट सेवा नैहुके व्यक्तिगत ओ कार्यालय प्रयोजनमे समेत बाधा पुगल बा । नेपाल टेलिकम बझाङके ग्रामीण भेगमे जीएसएम ओ सीडीएमए सेवा विस्तार करले बा ।
सदरमुकाम चैनपुरमे रहल टावर ओ बातालेकमे रहल टावरमे जेनेटर हुके टेलिफोन नेटवर्कहे सिस्टममे नन्ना सहजिल हुइल बटैटि नेपाल टेलिकम शाखाके निमित्त प्रमुख बमबहादुर सिंह कलैं, ‘अन्य टावरमे सोलार प्यानलसे चार्ज नैहुके लम्मा समय पानी परल ओ बड्रि लागल दिन नेटवर्क अवरुद्ध हुइठ ।
बझाङ जिल्लामे नेपाल टेलिकमलगायत अन्य कम्पनीके झण्डे २५ ठोसे ढेर टेलिफोन टावर बा ।
