खुटियाके बाढ कनरी गाउँ पैंठल
पहुरा |
७ श्रावण २०७८, बिहीबार
पहुरा समाचारदाता
धनगढी, ७ सावन । कुछ दिनके लगातार परल पानीसे कैलालीके टमान ठाउँ डुबान परल बा ।
बिफेक रोज कैलालीके खुटिया लडियामे आइल बाढ कनरी गाउँमे पैंठल बा । कनरी गाउँके ९/१० घरमे बाढ पैंठल स्थानीयहुक्रे बटैले बाटै । बाढसे कनरी गाउँमे मच्छी पालनके लाग बनाइल पोखरी ड्याम भट्काइल समेत स्थानीयहुक्रे बटैले बाटै ।
ओस्टके कैलालीके घुरहा लडियामे आइल बाढ कैलारी गाउँपालिका वडा नम्बर ४ भिटरिया गाउँमे फेन कुछ घर पानी पैँठल जनाइल बा । कलेसे कटैनी लडियामे आइल बाढ फेन मनकापुर, बैजपुर, सपना शिविर, बर्का बसन्ता, छुट्की बसन्ता, भुँइयाँफाँटा लगायत गाउँमे पैठल जनाइल बा ।
