काँग्रेसके वडा अधिवेशन स्थगित
काठमाडौं, ९ सावन । नेपाली काँग्रेसके वडा अधिवेशन स्थगित हुइल बा । यीआघे देशभर वडा अधिवेशन सावन १२ गतेके लाग तोकल रहलेसे फेन शनिच्चर बैठल पदाधिकारी ओ पूर्वपदाधिकारी बैठक स्थगित करना निर्णय करल हो ।
‘सावन १२ के वडा अधिवेशन स्थगन करना सल्लाह पदाधिकारी बैठकमे हुइल बा,’ काँग्रेस प्रवक्ता विश्वप्रकाश शर्मा कलैं, ‘आब कब करना कनामे पाछे निर्णय हुइ ।’
प्रवक्ता शर्मा महाधिवेशन कार्यतालिका प्रभावित हुइलेसे फेन भदौ १६ से सुरु हुइना केन्द्रीय महाधिवेशनके बारेमे कौनो निर्णय नैहुइल बटैलैं । ‘वडा अधिवेशन स्थगन हुइनाके अर्थ केन्द्रीय महाधिवेशन फेन सरि कना नैहो,’ उहाँ कलैं, ‘अब्बे केन्द्रीय महाधिवेशनके मिति यथावत बा ।’
वडा अधिवेशन स्थगन हुइलसँगे काँग्रेसके महाधिवेशन कार्यतालिका फेन प्रभावित हुइल बा । काँग्रेस १२ सावनमे वडा अधिवेशन, १६ सावनमे स्थानीय तहके अधिवेशन, २० सावनमे प्रदेश सभा निर्वाचन क्षेत्रके अधिवेशन करना करके कार्यतालिका सार्वजनिक करले रहे ।
ओस्टेक प्रतिनिधि सभा निर्वाचन क्षेत्र ओ एक किल प्रतिनिधि सभा निर्वाचन क्षेत्र रहल जिल्लाके अधिवेशन २३ सावन, एकसे ढेर प्रतिनिधि सभा निर्वाचन क्षेत्र रहल जिल्ला अधिवेशन २६ सावन, प्रदेश अधिवेशन १ ओ २ भदौ ओ केन्द्रीय महाधिवेशन १६–१९ भदौमे हुइना कार्यतालिका रहे ।
क्रियाशील सदस्यताके काम कार्यतालिका अनुसार नैहुके महाधिवेशन प्रभावित हुइल हो । शनिच्चर सभापति देउवाके निजी निवास बुढानीलकण्ठमे बैठल पदाधिकारी बैठकमे क्रियाशील सदस्यता छानविन समितिके संयोजक रमेश लेखक अब्बेसम समितिसे करल कामके बारेमे जानकारी करैले रहैं ।
समिति १२ सावनमे सदस्यताके अन्तिम सूची सभापति देउवाहे बुझैना हुइल बा । सभापति देउवासे हस्ताक्षर करलपाछे क्रियाशील सदस्यताके सूची केन्द्रीय निर्वाचन समितिहे हस्तान्तरण करि । उपाछे निर्वाचन समितिसे देशभरके सब वडामे निर्वाचन अधिकृत खटाइ ।
काँग्रेस महाधिवेशनमे क्रियाशील सदस्य प्रारम्भिक मतदाता हो । क्रियाशील सदस्यसे वडा समिति चयन करनाके साथे क्षेत्रीय प्रतिनिधि निर्वाचित करहि । क्षेत्रीय प्रतिनिधिसे जिल्ला नेतृत्वके साथे केन्द्रीय महाधिवेशन प्रतिनिधि चयन करना काँग्रेसके विधानके व्यवस्था बा । काँग्रेसमे १४ औं महाधिवेशनमे आठ लाख ५० हजार ढेर क्रियाशील सदस्य रहल बटैं ।
बैठकमे सभापति देउवा पार्टी कार्यालय सानेपामे जारी धर्ना ओ अनसनके सम्बोधन करना निर्देशन डेले बटैं । उहाँ शनिच्चर साँझसम धर्नामे बैठल नेता कार्यकर्ताके विषयगत माग सम्बोधन करना निर्देशन डेहल हुइँट् ।
देउवा सहमहामन्त्री डा. प्रकाशशरण महत ओ पूर्वसहमहामन्त्री डा. रामशरण महतहे धर्नामे बैठलहुकनसँग वार्ता करना जिम्मेवारी डेले बटैं ।
