निर्माणाधीन सडकके अनुगमन
कञ्चनपुर, ९ सावन । सुदूरपश्चिम प्रदेशके मुख्यमन्त्री त्रिलोचन भट्ट सहितके टोली कञ्चनपुरमे निर्माणाधीन टमान सडकखण्डके स्थलगत अनुगमन करले बाटै ।
शनिच्चरके मुख्यमन्त्री भट्ट टोलीसे जिल्लाके बेलौरी कलुवापुर सडकखण्ड, कलुवापुर नाइल बुडर सडकखण्ड ओ दैजी लिप्ना सडकखण्ड लगायतके आयोजनाके स्थलगत अनुगमन करल हुइट ।
ओहे क्रममे कञ्चनपुरके बेलौरी नगरपालिका कार्यालयमे आयोजित साक्षात्कार कार्यक्रममे बेलौरी नगरपालिकाके नगर प्रमुख पोतिलाल चौधरी बेलौरी–कलुवापुर सडकखण्ड ओ डोकेबजार–बेलौरी–बेलडाँडी–दैजी हुलाकी सडकखण्ड कालोपत्रेके बाँकी काम, ड्रेन निर्माण, सीमा सम्बन्धी समस्या समाधान ओ भन्सार नाका स्तरोन्नति लगायतके सन्दर्भमे प्रदेश सरकारसँग आवश्यक सहयोगके लाग ज्ञापनपत्र पेस करल रहिट ।
उहे कार्यक्रमहे सम्बोधन कैटी मुख्यमन्त्री त्रिलोचन भट्ट प्रदेश सरकारके अधिकार क्षेत्र भिट्टर रहिके आवश्यक सहयोग कैना प्रतिबद्धता व्यक्त करल रहिट । प्रदेश सरकार मातहत रहल कलुवापुर–बेलौरी सडकखण्डमे अधिकांश कार्य पूरा हुइल ओ बाँकी अवरोध समेत समाधान कैना ओर प्रदेश सरकार केन्द्रित रहल बटैलै । हुलाकी सडकखण्ड, सीमा विवाद ओ भन्सार नाका स्तरोन्नति लगायतके विषयमे संघीय सरकारसँग पहल कैना मुख्यमन्त्री भट्टके कहाइ बा ।
स्थलगत अनुगमन सामाजिक विकास मन्त्री लाल बहादुर खड्क प्रदेश सभा सदस्यद्वय महेशदत्त जोशी ओ कुलबीर चौधरी, भौतिक विकास मन्त्रालय तथा पूर्वाधार विकास कार्यालयके प्रतिनिधिके फेन सहभागिता रहल रहे ।
