भारतमे नेंगट गाडीमे ढुंगा गिरक ९ के मृत्यु
काठमाडौं, ११ सावन । उत्तरी भारतमे नेंग्टिरहल गाडीमे ढुंगा गिरके ९ जाने पर्यटकके मृत्यु हुइल बा । अँट्वार हिमाचल प्रदेशमे हुइल उ दुर्घटनामे परके थप तीनजाने घाहिल हुइल बटैं । भारतीय सञ्चारमाध्यमसे सार्वजनिक करल एक भिडियोमे पहाडके उप्परसे गिरल ढुंगासे एक पुल भस्कल डेखाइल बा ।
हिमाचल प्रदेशके मुख्यमन्त्री जाइराम ठाकुर यी घटनाहे हृदयविदारक कले बटैं । सामाजिक सञ्जाल ट्वीटरमे रहल कुछ भिडियोमे पुलहे पहिरोसे भस्कैनासे पहिले आसपासमे पार्क करके ढरल गाडीहे ढुंगा लागल डेखाइठ ।
भारतीय प्रधानमन्त्री नरेन्द्र मोदी उ दुर्घटनामे आफन्त गुमाइल परिवारप्रति समवेदना व्यक्त करले बटैं । मोदी दुर्घटनामे ज्यान गुमाइलहे आवश्यक राहत उपलब्ध करैना बटैले बटैं ।
हिमाचल प्रदेशके मुख्यमन्त्री ठाकुर पीडितहे तत्काल सहयोग उपलब्ध करैना निर्देशन डेले बटैं । मृत्यु हुइना आन्तरिक पर्यटकमे कुछ राजधानी सहर दिल्लीके बासिन्दा रहल समाचारमे उल्लेख बा ।
अभिनसम का कारणसे ढुंगा गिरल हो कना स्पष्ट हुइल नैहो । मने, भारी वर्षा हुइल ओरसे पहिरोके कारण ढुंगा गिर हुइ सेक्ना अनुमान करल बा । पछिल्का कुछ दिनयहोर भारतमे बाढपहिरोके प्रकोप बह्रना क्रममे डेखाइल बा । भारतके महाराष्ट्रमे फेन भारी वर्षापाछेक बाढ तथा पहिरोमे परके १३६ जहनके मृत्यु हुइल बा ।
– एजेन्सी
