निर्वाचन आयोगसे जसपाके आधिकारिकता उपेन्द्र यादव पक्षहे

काठमाडौं, ११ सावन । निर्वाचन आयोग उपेन्द्र यादव पक्षहे जनता समाजवादी पार्टी (जसपा) के आधिकारिकता डेले बा । सोम्मार आयोगमे ‘हेड काउन्ट’ पाछे बहुमत रहल कटि आयोगके पाँच सदस्यीय इजलाससे आधिकारिकता यादव पक्षहे डेहल आयोगके प्रवक्ता राजकुमार श्रेष्ठ जानकारी डेलैं ।

प्रवक्ता श्रेष्ठके अनुसार जसपाके महन्थ ठाकुर पक्षहे दल दर्ताके अवसर डेके आधिकारीकता भर उपेन्द्र यादव पक्षहे डेना इजलाससे निर्णय करल हो । ’आयोगके इजलाससे उपेन्द्र यादव पक्षहे बहुमतके आधारमे आधिकारीकता डेना निर्णय करल बा । औरे पक्षहे दल दर्ताके अवसर डेना कना निर्णय हुइल बा,’ उहाँ कलैं । दल दर्ताके लाग कत्रा दिन डेहल हो कना यकिन नैहुइल प्रवक्ता श्रेष्ठ बटैलैं ।

सर्वोच्च अदालत जसपाके अध्यक्ष महन्थ ठाकुर पक्षके मागबमोजिम अँट्वार अन्तरिम आदेश डेना अस्वीकार करलसँगे औरे अध्यक्ष यादव पक्षहे निर्वाचन आयोगसे पार्टीके आधिकारिकता डेहल हो ।

५१ सदस्सीय जसपा केन्द्रीय कार्यकारिणी समितिमे यादवके पक्षमे ३४ जाने आयोगमे उपस्थित हुके सनाखत करले रहैं । अस्टेक, महन्थ ठाकुरके पक्षमे १६ जाने सदस्य समर्थन करले रहैं । निलम्बित सांसदसमेत रहल जसपा केन्द्रीय कार्यकारिणी सदस्य रेशम चौधरी भर तटस्थ बैठ्लैंं ।

रेशम चौधरीहे सनाखतके लाग डिल्लीबजार कारागारसे आयोगकमे लैगिल रहे । उहाँ अप्ने पार्टीके बफादार सिपाही रहल ओरसे केक्रो पक्ष ओ विपक्षमे ठह्रिना नियत ओ नैतिकतासे नैडेहल बटैलैं ।

काँग्रेस सभापति शेरबहादुर देउवाहे प्रधानमन्त्री बनैना सघाइल जसपाके यादव पक्ष निर्वाचन आयोगसे आधिकारिकता विवाद टुंगो लगालसँगे आब सरकारमे जाइ ।

यादव पक्षहे पर्खके देउवा मन्त्रिपरिषद् विस्तार करले नैहुइँट् । आयोग दल दर्ताके बखत सनाखत करल ५१ सदस्यहे सोम्मार ’हेड काउन्ट’ करना बलैले रहे ।

तत्कालीन राष्ट्रिय जनता पार्टी (राजपा) ओ समाजवादी पार्टीबीच २०७७ वैशाख ११ गते एकीकरण हुके जसपा बनल हो । निर्वाचन आयोगमे नयाँ दल दर्ता भर २०७४ असार २४ हुइल रहे । ओकरपाछे पार्टीभित्तर नेता व्यवस्थापनके खटपट बह्रल बेला तत्कालीन प्रधानमन्त्री केपी शर्मा ओलीहे साथ डेना कि नैडेनाकना मुद्दामे जसपा वैचारिक रूपमे विभाजित हुइल रहे । गैत पुस ५ गतेक पहिल प्रतिनिधिसभा विघटनविरुद्ध जसपाके दुनु पक्ष एकठाउँमे रहैं । सर्वोच्च अदालतसे फागुन ११ गते प्रतिनिधिसभा पुनःस्थापना करलपाछे भर ओलीहे सहयोग करना कि नैकरना कनामे ठाकुर ओ यादव पक्षबीच फुट बह्रल रहे ।

ठाकुर पक्ष ओली नेतृत्वके सरकारमे सहभागी हुइलपाछे पार्टी प्राविधिक रूपमे एक रलेसे फेन व्यावहारिक रूपमे फुटल रहे । एकऔरे उप्पर कारबाहीके शृंखला चलेबेर यादव पक्षसे निर्वाचन आयोगमे पार्टीके आधिकारिकताके माग करटि निवेदन डेले रहे । निर्वाचन आयोगमे दल दर्ता करेबेर यादव नेतृत्वके तत्कालीन समाजवादी पार्टीसे २५ ओ ठाकुरसहितके नेतृत्वमे रहल राजपासे २६ सदस्य ढरल रहे । नेता महेन्द्रराय यादवसहित पूर्वराजपा पक्षके ७ जाने सदस्य यादव पक्षमे गैल रहैं ।

सम्बन्धित समाचार

जसपा विवादमे रेशम चौधरी तटस्थ

रेशम चौधरी निर्वाचन आयोग पुग्लैं

निर्वाचन आयोगमे जसपाके नेताहुकनके सनाखत सुरु