लुम्बिनी सरकार विश्वासके मत लेना

बुटवल, १२ सावन । लुम्बिनी प्रदेश सरकारके प्रवक्ता बैजनाथ चौधरी सरकारसे विश्वासके मत लेना बटैले बटै ।

मंगरके मन्त्रिपरिषद्के बैठकसे करल निर्णय सार्वजनिक कैना क्रममे आर्थिक मामिला तथा योजना मन्त्री चौधरी विपक्षी दलहुक्रे सरकार अल्पमतमे रहल ओ अवैधानिक रहल आरोप लगैटी रहल ओरसे सरकारसे विश्वासके मत लेके वैधानिक बन्ना बटैलै ।

मन्त्री चौधरी जनता समाजवादी पार्टीके आधिकारिकता उपेन्द्र यादव पक्षसे पैलेसेफे प्रदेश सरकारहे फरक नइपर्ना बटैलै । जसपाके सांसद पुर्मति ढेंगामगरहे सत्ता पक्षसे नइनुकाइल दाबी करटी मन्त्री चौधरी सरकार गैरसंसदीय खेलमे नइलग्ना बटैलै ।

यिहेबीच लुम्बिनी प्रदेश सरकारसे बालविवाह अन्त्यके लाग लुम्बिनी प्रदेशके रणनीति स्वीकृति प्रदान करले बा । ओस्टेक प्रदेश खेलकुद विकास नियमावली–२०७८ स्वीकृत कैना निर्णय करल प्रवक्ता चौधरी बटैलै ।