लुम्बिनीके ३ सांसदहे निष्कासन कैना जसपाके निर्णय
काठमाडौं, १२ सावन । जनता समाजवादी पार्टीसे अपन पार्टीसे लुम्बिनी प्रदेशसभामे निर्वाचित ३ जाने प्रदेशसभा सदस्यहे कारबाही करले बा ।
मंगरके बैठल जसपा कार्यकारिणी समितिके बैठकसे लुम्बिनी प्रदेशसभा सदस्य सन्तोषकुमार पाण्डेय, विजयबहादुर यादव ओ कल्पना पाण्डेहे प्रदेशसभा सदस्यसे कारबाही करल कार्यकारिणी सदस्य गंगा श्रेष्ठ जानकारी डेलै ।
जसपाके निर्णय विपरीत लुम्बिनी प्रदेश सरकारमे सहभागी ओइनहे यी आघे फे जसपासे पार्टीसे निष्कासन करल रहे । जसपाके निर्णयके आधारमे लुम्बिनी प्रदेशसभा सचिवालयसे ओइने सांसद नइरहल कहिके सूचना प्रकाशन करल रहे ।
पार्टी ओ प्रदेशसभा सचिवालयके निर्णय विपरीत रिट लेके सर्वोच्च अदालत गैल ओइनके पद सर्वोच्चके आदेशमे थमौती हुइल रहे । उपेन्द्र यादव पक्षसे निर्वाचन आयोगसे आधिकारिकता पाइलपाछे फेर उ सांसदहुकनहे कारबाही करल हो ।
लुम्बिनी प्रदेश सरकारमे जसपाके ४ जाने सांसद सहभागी हुइलेसेफे कुछ डेना आघे सुमन शर्मा रायमाझीसे राजीनामा डेहल रहिट ।
मंगरके बैठल जसपा केन्द्रीय कार्यकारिणी समितिके बैठकसे पार्टीके संसदीय दलके विधान अनुमोदन करले बा । ओस्टेक नवराज सुवेदीके संयोजकत्वमे रमेश यादव ओ सुशीला श्रेष्ठ सदस्य रहना करके ३ सदस्यीय निर्वाचन समिति गठन करले बा । ओस्टेक जसपाके ओरसे स्थानीय तहमे निर्वाचित मने और पार्टीमे गैल जनप्रतिनिधिहे पदमुक्त कैना निर्वाचन आयोगमे सिफारिस करले बा ।
