कर्णालीमे डुंगा दुर्घटना हुके ३ बेपत्ता

धनगढी, १७ सावन । कर्णाली नदीमे डुंगा दुर्घटना हुके ३ जाने बेपत्ता हुइल बटैं । कैलालीके मोहन्याल गाउँपालिका ३ से सुर्खेतके चौकुने गाउँपालिका–४ जैटिरहलहुक्रे दुर्घटनामे परल बटैं ।

मोहन्याल गाउँपालिका–३ के २० वर्षिया पार्वती थापा, मोहन्याल गाउँपालिका–३ के २० वर्षिया उर्मिला सलामीमगर ओ उहाँक १० दिनके छावा बेपत्ता हुइल बटैं ।

डुंगामे १० जाने सवार रहैं । ओइने खोप लगाइ कैलालीसे सुर्खेत जाइबेर दुर्घटनामे परल प्रहरी जनैले बा ।

दुर्घटनामे दुई जाने घाहिल हुइल बटैं । अन्य पाँच जाने सकुशल बटैं । घाहिल हुइलमे मोहन्याल ३ के धनसरा सलामी मगर ओ उहाँक १ महिनाके छावा कर्ण बटैं । प्रहरीके अनुसार १९ वर्षिया धनसराके अवस्था गम्भीर बा । कर्णके अवस्था सामान्य बा ।

घटनास्थलमे कैलालीके सुगरखाल ओ सुर्खेतके बाबियाचौरसे प्रहरी टोली खोज तथा उद्धार कार्यमे खटल बा ।