बैतडीमे भाइरल ज्वरोके बिरामी बह्रलै

बैतडी, १९ सावन । मौसममे आइल परिवर्तनसंगे बैतडीमे भाइरल ज्वरोके बिरामी बह्रटी गैल बाटै । सदरमुकाममे रहल जिल्ला अस्पताल ओ जिल्लाके अन्य स्वास्थ्य संस्थामे भाइरल ज्वरोके बिरामी बह्रटी गैल हुइट । जिल्ला अस्पतालमे हाल दैनिक ६० से बिरामी अइना करल अस्पतालके प्रमुख डा. वशन्तराज जोशी बटैलै ।

ओस्टके‚ श्रीकोट स्वास्थ्य चौकीमे फेन उपचारके लाग अइना करल बिरामीमध्ये अधिकांश ज्वरो ओ रुघाखोकीके रहल चौकीके प्रमुख वीरसिंह भाट बटैलै । मौसममे आइल परिवर्तन ओ निषेधाज्ञा खुकुलो हुइलसंगे ज्वरोेके बिरामी बह्रल डा. जोशीके कहाइ बा ।

वर्षातके समयमे पानीके मुहान दूषित हुइनासे पानी शुद्धिकरण कैके किल प्रयोग कैना तथा पानी उमालके पिना डा. जोशी सुझाव डेले बाटै । साथे‚ निषेधाज्ञा खुकुलो हुइलसंगे भीडभाड बह्रल, मास्क ओ अन्य स्वास्थ्य सुरक्षाके मापदण्ड पालना कैना फेन आग्रह करल बा । ओस्टके व्यक्तिगत ओ सरसफाइमे फेन विशेष ध्यान डेना स्वास्थ्यकर्मीहुक्रे सुझैले बाटै ।