कक्षा १२ के परीक्षा स्थगित
काठमाडौं, २३ सावन । राष्ट्रिय परीक्षा बोर्ड कक्षा १२ के परीक्षा स्थगित करना निर्णय करले बा ।
शनिच्चर बैठल बोर्डके बैठकसे आगामी सावन ३१ गतेसे भदौ ९ गतेसम हुइना कक्षा १२ के परीक्षा स्थगित करल शिक्षा, विज्ञान तथा प्रविधि मन्त्रालयके सचिव रामप्रसाद थपलिया जानकारी डेलैं ।
कोरोना संक्रमितके संख्या बह्रटि गैल कारण परीक्षा सञ्चालन करना कठिनाइ उत्पन्न हुइल ओरसे स्थगित करल उहाँ बटैलैं । उहाँ कलैं, अब्बेक लाग स्थगित करले बटि । बाँकी परीक्षा हुइना पन्द्र दिन आघे सूचना जारी करके जानकारी डेना निर्णय हुइल बा ।
यीआघे कोभिड–१९ संकट व्यवस्थापन केन्द्र (सीसीएमसी) कोरोना संक्रमण बह्रल कारण तत्काल परीक्षा करे नैसेक्ना कटि बोर्डहे नयाँ मिति तय करना पत्राचार करले रहे ।
विद्यार्थी संगठन ओ अभिभावकहुक्रे सब परीक्षार्थी ओ परीक्षामे संलग्न सबहे कोभिड विरुद्धके खोपके व्यवस्थापन करना, व्यवस्थापन करे नैसेक्लेसे स्थगित करना माग करटि आइल रहैं ।
कुछ दिनआघे स्वाथ्य राज्यमन्त्री उमेश श्रेष्ठ कोरोना संक्रमण बह्रल ओरसे भौतिक रुपमे परीक्षा नैकरके आन्तरिक मूल्याङकनसे करे सेक्ना बटैले रहैं । मने राष्ट्रिय परीक्षा बोर्ड परीक्षाके तयारी अन्तिम चरणमे पुगल ओ परीक्षा हुइना बटैटि आइल रहे ।
परीक्षा अइना एक हप्ता बाँकी रहलमे स्वास्थ्य मन्त्रालयके सिफारिसमे सीसीएमसी परीक्षाके नयाँ मिति तय करना अनुरोध करलपाछे बोर्ड फेन ओहे अनुसार तत्कालहे स्थगित करले बा ।
कैसिन रहे परीक्षाके तयारी ?
बोर्ड भौतिक दुरी कायम करके एक कक्षामे २५ जाने किल विद्यार्थी ढरना करके तयारी करले रहे । साथे परीक्षा केन्द्रमे स्वाथ्य परीक्षण करना, परीक्षा अगावे अनिवार्य रुपमे पीसीआर परीक्षण करना, केन्द्रमे हेल्थडेक्स ढरना लगायत तयारी करना सब केन्द्रहे निर्देशन डेले रहे ।
परीक्षा बोर्ड यीबेर १०० पूर्णांकके परीक्षा करैना तयारी करले रहे । बोर्डसे गैलवर्ष परीक्षा समय ओ अंक भार घटाके परीक्षा लेले रहे । बोर्ड ४० प्रतिशत मूल्यांकनके लाग किल परीक्षा लेले रहे ।
बाँकी ४० प्रतिशत मूल्यांकन कक्षा ११ के नतिजाके आधारमे ओ २० प्रतिशत आन्तरिक मूल्यांकनके आधारमे परीक्षा हुइल रहे । कक्षा १२ मे तीन लाख ७२ हजार तीन सय ४८ परीक्षार्थीके लाग बोर्ड चार हजार तीन सय १० परीक्षा केन्द्र तोकसेकले रहे ।
