पहुरा दैनिक मातृभाषा पत्रकारिता सम्मानके लाग छनौट
पहुरा समाचारदाता
धनगढी, २३ सावन । नेपाल आदिवासी जनजाति पत्रकार महासंघ (फोनिज)से फोनिज अवार्ड ओ फोनिज मातृभाषा पत्रकारिता सम्मानके लाग छनोट हुइल संचारमाध्यम तथा पत्रकारहुकनके नाम सार्वजनिक करले बा । फोनिजके संघीय सचिवालयसे उ नामावली सार्वजनिक करल हो ।
फोनिजसे हरेक वर्ष स्थापना दिवसके अवसरमे प्रदान करटी आइल बा । मने गैल बरस कोरोना भाइरसके महामारीके कारण रोकल उ पुरस्कार रोकल रहे । फोनिजके संघीय समितिसे यिहे वरससे स्थापना करल ‘फोनिज मातृभाषा पत्रकारिता सम्मान–२०७८’ से कैलालीसे प्रकाशित हुइटी आइल थारु भाषाके पत्रिका पहुरा दैनिक ओ काठमाडौंसे प्रकाशित हुइना लिम्बू भाषाके पत्रिका तान्छोपा मासिक संयुक्त रुपमे सम्मानित हुइना जनागिल बा ।
ओस्टेक ‘आदिवासी जनजाति राष्ट्रिय पत्रकारिता पुरस्कार (फोनिज अवार्ड)’ गैल वरस कोरोना भाइरसके महामारीके कारण रोकलमे दुनु वरसके लाग टमान विधामे आठ जाने पत्रकार छनोट हुइल फोनिज जनैले बा ।
जौन अनुसार फोनिज अवार्ड–२०७७ छापाओर गोरखापत्र दैनिकके शेर्पा भाषा पृष्ठ संयोजक आङदावा शेर्पा, रेडियोओर जलजला एफएम रोल्पाके मौसम रोकामगर, टेलिभिजनओर इन्डिजिनियस टेलिभिजनके कुमार यात्रु तामाङ ओ अनलाइनओर स्वतन्त्र पत्रकार राजकुमार दिक्पालहे प्रदान कैना निर्णय हुइल फोनिज जनैले बा ।
ओस्टेक फोनिज अवार्ड–२०७८ छापाओर कास्कीके स्वतन्त्र पत्रकार तिलक पुन, रेडियोओर रेडियो नेपालके रचना श्रेष्ठ, टेलिभिजनओर झापाके इन्द्रजीत मुखिया ओ अनलाइनओर झिल्को डटकमके भवानी बरालहे प्रदान कैना हुइल बा ।
फोनिज अवार्डके राशी जनही पुरस्कार २० हजार रुप्या बा । ओस्टेक मातृभाषा पत्रकारिता सम्मानके राशी २० हजार रुप्या रहलमे संयुक्त रुपमे प्रदान कैना जनैले बा । फोनिज अवार्ड, फोनिज मातृभाषा पत्रकारिता सम्मान फोनिजके २२औं स्थापना दिवसके अवसरमे यिहे सावन २७ गते काठमाडौंमे हुइना कार्यक्रममे वितरण कैना जानकारी डेहल बा । साथे, उहे अवसरमे फोनिज यूके शाखा प्रदान कैना ‘फोनिज यूके पत्रकारिता सम्मान ओ पुरस्कार’ प्रदान कैना जनाइल बा ।
