दिनेश फाउण्डेशनसे वृहत रक्तदान कार्यक्रम
पहुरा समाचारदाता
धनगढी, २३ सावन । दिनेश ग्रुप अन्तर्गतके गैर नाफामुखी सामाजिक संस्था दिनेश फाउन्डेसनसे ‘रक्तदान जीवनदान’ कना मूल नाराके साथ शनिच्चरके रोज धनगढीमे ९औं रक्तदान कार्यक्रमके करले बा । बार्षिक कार्यतालिका अनुसार रक्तदानके आयोजना करल फाउण्डेशनके कार्यकारी अध्यक्ष श्याम हमाल बटैलै ।
रक्तदान कार्यक्रमके वडका पहुना रहल धनगढी उपमहानगरपालिका नगर प्रमुख नृप बहादुर वड ओ विशिष्ट पहुना जिल्ला प्रहरी कार्यालय कैलालीके प्रमुख विश्व अधिकारी, प्रदेश खेलकुड सचिव दिपक विष्ट, वडा नम्बर ४ अध्यक्ष दिपक थापा, कैलाली उद्योग बाणिज्य संघ कैलालीके वरिष्ठ उपाध्यक्ष पुस्कर ओझा, कार्यक्रममे एथलेक्टिसके केन्द्रीय उपाध्यक्ष तेजेन्द्र थापा लगायत फाउण्डेशनसे करल कामके प्रंशसा करले रहिट । कार्यक्रमके संचालन अधिवक्ता विरबहादुर जेठारा करले रहिट ।
रक्तदान कार्यक्रममे ६१ जाने रक्तदान करल रहिट । फाउण्डेशन अन्र्तगत १०० से ढेर कर्मचारी रक्तदान कैना तयार हुइलेसेफे भर्खर कोभिडके खोप लगाइल कारण ओइने रक्तदान करे नइपइलै ।
फाउण्डेसनसे ओलम्पिक म्याराथन धावक गोपीचन्द्रहे आर्थिक सहयोग
टोकियो ओलम्पिक खेल्नसे वञ्चित कराइल म्याराथन धावक गोपीचन्द्र पार्कीहे अइना ओलम्पिकके तयारीमे सहयोग होए कहटी दिनेश फाउण्डेसनसे आर्थिक सहयोग करले बा ।
दिनेश ग्रुपअन्तर्गतके गैर नाफामुखी सामाजिक संस्था फाउन्डेसनसे ‘रक्तदान जिवनदान’ कना मूल नाराके साथ आयोजना करल ९औं रक्तदान कार्यक्रममे ओलम्पिकके तयारीमे जुटल पार्कीेहे ३ लाख ६० हजार सहयोग कैना प्रतिबद्धतासहित दोसल्ला ओढाके सम्मान करले बा ।
