घोडीघोडा तलुवामे ३१/३२ प्रजातीके मच्छरी
स्वरुप चौधरी
सुखड, २३ सावन । कैलालीके घोडाघोडीनगरपालिकास्थित विश्व रामसारमे सुचिकृत घोडीघोडा तालक्षेत्रमे मच्छरी सर्बेक्षण कार्य कैगिल बा ।
घोडीघोडा तालक्षेत्रमे संरक्षण ओ पर्यटनके पूर्वाधार बिकास सम्बन्धी प्रोजेक्ट अन्र्तगत गैल बर्षसे सुरु करल सर्बेक्षण कार्य शनिच्चरके रोज सेकल हो । पर्यटकीय ओ जैविक विविधता बोकल क्षेत्रमे बिगत दुई बर्ष लगाके मच्छरीके सर्बेक्षण करल बा । तालमे कटरा प्रजातीके मच्छरी पैठै कना एकिन नइहुइल ओरसे घोडाघोडी तालमे मच्छरी सर्बेक्षण करल हो ।
प्रायःतालमे कटरा प्रजातीके मच्छरी पैठै कना प्रश्नमे कोई २९ कोई ३० कोई ३२ आ–अपन सर्बेक्षण अनुसार प्रकाशन करले रहिट । उ कारण घोडाघोडी तालमे वास्तबमे कटरा प्रजातीके मच्छरी पैठै कहिके दुई बर्ष लगाके जार मौसम, गर्मी मौसम, बर्खे मौसम, करके सक्कु मौसममे मच्छरीके सर्बेक्षण करल रहे ।
शनिच्चरके करल सर्बेक्षण अन्तिम रहल बृहत घोडाघोडी ताल तथा पर्यटन बिकास बोर्डके उपाध्यक्ष दयाराम चौधरी बटैलै । घोडाघोडी तालक्षेत्रमे अभिनसम ३१ सय ३२ प्रजातीके मच्छरी सर्बेक्षण करल बा ।
आब बिज्ञहुक्रे प्रमाणित करलै कलेसे यिहीहे प्रकाशन करके आधिकारिक मान्यता डेजाई ओ घोडघोडी ताल क्षेत्रमे कटरा प्रजातीके मच्छरी बटै ओ कटराम मच्छरी स्टक बटै कना बाट जानकारी हुइना चौधरी बटैलै ।
