मौद्रिक नीति यिहे साता सार्वजनिक हुइना
काठमाडौं, २५ सावन । सरकार परिवर्तनके कारण सार्वजनिक हुइ नैसेकल मौद्रिक नीति यिहे साताभित्तर सार्वजनिक हुइना हुइल बा । नेपाल राष्ट्र बैंक आगामी शुकसम मौद्रिक नीति सार्वजनिक कना करके तयारी ओरवैल हो ।
राष्ट्र बैंकके प्रवक्ता देवकुमार ढकाल यी साताभित्तरमे मौद्रिक नीति सार्वजनि करना तयारी रहल बटैलैं । आन्तरिक तयारी पुरा नैहुइल कारण कुछ ढिल हुइल उहाँक कहाइ बा ।
सरकारसे नानल नीति तथा कार्यक्रम ओ बजेट कार्यान्वयनके लाग समेत सघाउँ पुग्ना मेरिक केन्द्रीय बैंकसे हरेक वर्ष मौद्रिक नीति तर्जुमा करके सार्वजनिक करना करल बा । साउन पहिल साता नीति सार्वजनिक करना मेरिक राष्ट्र बैंकसे तयारी समेत करल रहे ।
चालु आर्थिक वर्षके लाग तत्कालिन केपी शर्मा ओली नेतृत्वके सरकारसे बजेट नानसेकल पाछे नयाँ सरकार गठन हुइल । आर्थिक वर्षके अन्त्य हुइ लागल बेला नयाँ सरकार गठन हुइलपाछे सरकारी नीति ओ बजेट संशोधन हुइ सेक्ना कटि राष्ट्र बैंक मौद्रिक नीतिमे ढिलाइ करटि बा ।
मने अर्थमन्त्री जनार्दन शर्मा राष्ट्र बैंक स्वायत्त संस्था हुइल ओ अपने सुझावकिल डेहेसेक्ना बटैले बटैं । अर्थमन्त्री अनावश्यक हस्तक्षेप नैकरना संकेत पाइलपाछे गभर्नर महाप्रसाद अधिकारी प्रतिनिधिसभाके अर्थ समितिमे अँट्वार वा सोम्मार मौद्रिक नीति सार्वजनिक हुइल बटैले बटैं ।
अँट्वार मौद्रिक नीति सार्वजनिक नैहुइल । आज सोम्मार फेन सार्वजनिक हुइना सम्भावना नैरहल राष्ट्र बैंक स्रोत बटैले बा ।
‘सोम्मार ओ मंगरके सार्वजनिक हुइना सम्भावना नैहो, आब उपाछे यी साताभित्तरमे सार्वजनिक करना तयारी हो, राष्ट्र बैंक स्रोत कहल । सोम्मार ओ मंगरसम राष्ट्र बैंकके सञ्चालक समिति बैठक बैठ्ना तयारी समेत नैहो ।
