घुराहामे पुल निर्माण, स्थानीयहे सहजता

पहुरा समाचारदाता
धनगढी, २५ सावन । पुल नैहोके कष्टकर तथा जोखिमयुक्त जीवनयापन करल स्थानीयहे पुल निर्माण हुइल बाछे सहज हुइल बा । राजीपुर, गदरिया, फुलबारी जोर्ना कैलारी गाउँपालिका वडा नम्बर ६ घुराहा लडियामे पुल निर्माणपाछे यहाँके स्थानीयहे सहजता हुइल हो ।

कैलारी गाउँपालिका वडा नम्बर ६, बनकट्टाके भरत चौधरी लडियामे पुल निर्माण हुइलपाछे आवातजावतमे सहज हुइल बटैलै । पुल नैरहल बेला बर्षातमे इ क्षेत्रके स्थानीयहुक्रे जोखिम मोलके लडिया नाघे पर्ना बाध्यता रहल रहे । लडियामे बरवार बाढ आइल बेला उहाँहुक्रे धनगढी आउजाउके लाग हसुलिया, फुलवारी या टे महेन्द्र राजमार्ग, अत्तरिया हुइटी लम्मा डगराके प्रयोग करे पर्ना बाध्यता रहल रहे । पुल निर्माण पश्चात उ बाध्यता हटल भरत बटैलै ।

‘लडियामे बाढ आइल बेला ज्यान जोखिममे ढारके लाउसे लडिया नाघे पर्ना बाध्यता रहल रहे’, भरत कहलै–‘पुल निर्माणपाछे उ समस्या टरल बा ।’

पुल निर्माणसे इ क्षेत्रके स्थानीयहे आपन उत्पादनहे बजारीकरण कैना फेन सजिल हुइल औरे स्थानीय करम चौधरी बटैलै । उहाँ यहाँ उत्पादित बस्तुभाउहे बजारसम लैजैना फेन सजिल हुइना बटैलै ।

सुदूरपश्चिम प्रदेशके भौतिक पुर्वाधार विकास मन्त्री दीर्घबहादुर सोडारी अँट्वारके पुलके उद्घाटन करल रहिट । उद्घाटन कार्यक्रमहे सम्बोधन कैटी उहाँ निर्माण सम्झौता हुइल १७ महिनामे पुल निर्माण सम्पन्न कैके पुर्वाधार विकास निर्माणके कामहे तीब्रता डेहल प्रमाण डेहल बटैलै ।

उहाँ प्रदेश सरकार खोजुइयाहे जवाफ डेहक लाग घुराहा पुलहे तिब्रगतिमे निर्माण करल दावी करलै ।‘संघीयता मन नैपरुइयाहुक्रे खै प्रदेश सरकार कहिके चिल्लैटी रहल बाटै,’ मन्त्री सोडारी कहलै, ‘हम्रे घुराहा पुल बनाके हेरो प्रदेश सरकार जनताके काम कैटी बा कहले बाटी ।’

पुल निर्माणके लाग भौतिक पुर्वाधार विकास कार्यालयसे आर्थिक बरस २०७६/०७७ मे २ बरसमे काम सम्पन्न कैना मेरके ठेक्का लगाल रहे । एक सय ८ मिटर लम्बाई रहल उ पुल १३ करोड ५२ लाखमे रसुवा जयविष्णु जेभीसे निर्माण करल पुर्वाधार विकासके कार्यलय कैलालीके प्रमुख सिनियर डिविजनल ईञ्जिनियर श्याम खड्का बटैलै ।

पुल उद्घाटन प्रदेश सभाके प्रदेश मामिला तथा विधायन समितिके सभापति नेपालु चौधरी, प्रदेश सभा सदस्य सुशीला बुढाथोकी, कैलारी गाउँपालिकाके अध्यक्ष लाजुराम चौधरी लगायत मन्तव्य व्यक्त राखल रहिट ।