अफगानिस्तानमे रेडियो सम्पादकके हत्या, एक पत्रकार बन्धक
काठमाडौं, २६ सावन । अफगानिस्तानके पाकटिया घाग रेडियो स्टेसनके प्रधान सम्पादक टोफान ओमारीके अँट्वार काबुलके देह सब्ज जिल्लामे हत्या करल स्थानीय प्रशासन जनैले बा ।
उहाँहे अफगान तालिबान समूह हत्या करल हुइसेक्ना प्रशासन जनैले बा । यद्यपि, ओमारीके मृत्युके जिम्मेवारी अभिनसम कौनो फेन समूह लेले नैहो । अस्टेक ओइने युद्धग्रस्त अफगानिस्तानके हेलमन्ड प्रान्तमे एक टेलिभिजन पत्रकारहे बन्धक बनाके लैगिल बटागिल बा ।
अफगानिस्तानके खानमा प्रेससे बटाइलअनुसार स्थानीय बुस्ट रेडियो स्टेसनके प्रधान सम्पादक तथा खोस्ट प्रान्तमे अवस्थित गारगाख्ट टिभी च्यानलके संवाददाता नियाम तुल्लाह हेमतहे हेलमन्ड प्रान्तके नावा जिल्लामे तालिबान लडाकुहुक्रे बन्दी बनाके लैगिल रहैं । ओमारी अफगानके राजधानी काबुलके बाग्राम जिल्लाके न्यायिक तथा न्याय केन्द्रके वकिल फेन रहल बटागिल बा ।
खानमा प्रेससे बटाइलअनुसार अफगानिस्तानमे ओपन सञ्चारके लाग आवाज उठैटि आइल नाइ नामक संस्थाके प्रान्तीय प्रमुख अबुल सामी घारतमाल हेमातहे सोम्मार नावा जिल्लाके अपने घरसे बाहेर लैगिल बटैलैं । घारतमालसे अफगानिस्तानमे सञ्चारकर्मीहुकनसँग करल वाचा पालना करना ओ पत्रकारहे जत्रासेकटसम हलि रिहा करना तालिबानहे आग्रह करलैं ।
तालिबान समूह पछिल्का दिनमे हेलमन्ड प्रान्तके सब जिल्लाहे नियन्त्रण करले बा कलेसे प्रान्तीय राजधानी लश्करगाहमे अफगान राष्ट्रिय सैनिक तथा सुरक्षा बलसँग लरटा । पछिल्का समय तालिबानके आक्रामक गतिविधिके कारण कैयौँ सरकारी फौज ओ निर्दोष नागरिकहुकनके ज्यान गैल बा । अफगानिस्तानभर सोम्मार किल करिब ७० तालिवान लडाकूके मृत्यु हुइल सेना बटैले बा ।
गैल वर्षके फेब्रुअरीमे अमेरिका ओ तालिबानबीच हस्ताक्षर करल नयाँ शान्ति सम्झौताअन्तर्गत अमेरिकी सेना भारी संख्यामे युद्धग्रस्त अफगानिस्तान छोरे लागल कुछ समयपाछे यी समूह भारी तथा आक्रामक हमला करटि आइल बा ।
