आन्तरिक राजस्व विभागके नक्कली स्टिकरसहित पाँच पक्राउ
पहुरा समाचारदाता
धनगढी, २६ सावन । जिल्ला प्रहरी कार्यालय कैलाली सोम्मारके साँझ आन्तरिक राजस्व विभागके नक्कली स्टिकरसहित पाँच जनहनहे पक्राउ करले बा ।
गौरीगंगा नगरपालिका–७ स्थित तालबन्द सडक खण्डमे ना.३२ प ६२८१ नम्बरके मोटरसाइकलसहित भारतके लखिमपुर खिरी जिल्ला ग्राम पञ्चायत बरौठा, बैठुइया बरस १९ के संजित कुमार ओ मोटरसाइकल पाछे सवार उहे ठाउँके बरस २० के रिंकु कुमारहे ३ कार्टुन आन्तरिक राजस्व विभाग लिखल स्टिकर ७७ रोल फेला पारके डुनु जनहनहे पक्राउ करल प्रहरी जानकारी डेले बा ।
प्रारम्भिक अनुसन्धानके क्रममे उक्त स्टिकरके रोल मध्ये १३ रोल स्टिकरमे अक्के सिरियल नम्बर रहल स्टिकर घरी घरी डोहरल पाइल जिल्ला प्रहरी कार्यालय कैलालीके प्रवक्ता प्रहरी नायब उपरिक्षक प्रतीक बिष्ट बटैलै ।
उक्त स्टिकर उहे ठाउँमे रहल वेष्टर्न लिकर्स प्रालिसे लानके पक्राउ परलहुक्रे बैठ्ना कोठामे छाप लगाइ लैजाइ लागल अवस्थामे पक्राउ करल पवक्ता विष्ट बटैलै । उहाँ कोठामे जाके खानतलासी करेबर ७० युपी ३०० एमएल लिखल छाप ३ थान, स्ट्याम प्याड ३ थान ओ मसीसमेत बरामद कैके उक्त कोठामे रहल जिल्ला रौतहट गरुडा नगरपालिका १ जयनगर बैठुइया बरस ४० के राज कुमार शाह, जिल्ला पर्सा विरगंज महानगरपालिका १३ घन्टाघर बैठुइया बरस ५५ के विजय गुप्ता ओ भारतके जिल्ला लखिमपुर खिरी ग्राम पञ्चायत बरौठा, भारत बैठुइया बरस २२ के सुरेश कुमारहे समेत नियन्त्रणमे लेहल बटाइल बा ।
प्रवक्ता विष्ट आन्तरिक राजश्व कार्यालय कैलालीके सहयोगमे वेष्टर्न लिकर्स प्रालिहे शिल कैके थप अनुसन्धान हुइटी रहल बटैलै । कैलालीमे इहीसे आघे फेन मेघाश्री गुट्का उत्पादन करुइया लम्कीस्थित देउती प्याकेजिङ्ग आन्तरिक राजश्व विभागके नक्कली स्टिकर प्रयोग करल रहे ।
