प्रस्तावित गेटा मेडिकल कलेजहे सुप विश्वविद्यालय अन्तर्गत रख्ना माग

पहुरा समाचारदाता
धनगढी, २८ सावन । कैलालीके गेटामे निर्माणाधिन प्रस्तावित गेटा मेडिकल कलेजहे सुदूरपश्चिम (सुप) विश्वविद्यालय अन्तर्गत रख्ना माग करल बा ।

बिफेक रोज सुदूरपश्चिममे क्रियाशिल संयुक्त विद्यार्थी संगठनसे जिल्ला प्रशासन कार्यालय कञ्चनपुर मार्फत प्रधानमन्त्री तथा मन्त्री परिषदके कार्यालयहे ज्ञापनपत्र बुझैटी उ माग करल हुइट ।

ज्ञापनपत्रमे प्रस्तावित गेटा मेडिकल कलेजके प्रक्रिया आघे बह्रैना सन्दर्भमे शैक्षिक कार्यक्रम संचालनके मोडेल आभिन तयार नैहुइल ओरसे इहीहे संचालनमे लानक लाग सुप विश्वविद्यालय अन्तरगत रख्लेसे उपयुक्त हुइना उल्लेख करल बा । ‘अब्बे आके मेडिकल कलेजके रुपमे आघे बह्रैना वा छुट्टे स्वायत्त प्रतिष्ठान बनाके संचालन कैना कना विषय छलफल करे पर्ना डेखल बा ।

इ सन्दर्भमे सम्मानिय प्रधानमन्त्री ज्यु समक्ष हम्रे विद्यार्थी संगठनसे का धारणा रख्ना चाहटी कलेसे कौनो पुरान प्रणाली अन्तर्गत शिक्षा क्षेत्रके दायरा फराकिलो बनाइ नैसेक्ना प्रतिष्ठानके रुपमे नैहोके सुदुरपश्चिम विश्वविद्यालय अन्तर्गत लानके मेडिकल कलेजके रुपमे आघे बह्रैना सान्दर्भिक ओ वैज्ञानिक हुइना बा, ज्ञापनपत्रमे आघे कहल बा इ विषयहे सुदूरपश्चिमके करिब ३० लाख जनताके स्वास्थ्य तथा चिकित्सा शिक्षा, रोजगार ओ आर्थिक समृद्धि संगे राष्ट्रिय गौरवके रुपमे समग्र देशहे नै दुरगामी टेवा पुगैना मेरके सोचे परल ।

नेपाल विद्यार्थी संघके निवर्तमान केन्द्रीय सहमहामन्त्री अच्युतराज कलौनी, अनेरास्ववियुके केन्द्रीय सचिव गणेश सिंह ऐरी, समाजवादी विद्यार्थी युनियन केन्द्रीय सचिव भरत लिसानी, अखिल (क्रान्तिकारी) सेतीमहाकालीके संयोजक विरेन्द्र शाह, राष्ट्रिय प्रजातान्त्रिक विद्यार्थी संगठन सुदूरपश्चिम प्रदेश इन्चार्ज तथा केन्द्रीय उपाध्यक्ष उमेश विष्ट, अखिल (क्रान्तिकारी) सुदूरपश्चिम प्रदेशके कार्यवाहक संयोजक पुष्कर जोशी, वैज्ञानिक समाजवादी विद्यार्थी संगठन सुदूरपश्चिम प्रदेश संयोजक द्रोणाचार्य अवस्थी ओ अखिल (छैटौं) सुदूरपश्चिम प्रदेश सदस्य पुष्कर भट्टसे जारी ज्ञापन पत्रमे मेडिकल कलेजहे तत्काल सुप विश्वविद्यालय अन्तर्गत लानके शैक्षिक कार्यक्रम संचालनके नमूना तयार कैना माग करल बा ।