पत्रकारके भौतिक तथा पेशागत सुरक्षाबारे छलफल
पहुरा समाचारदाता
धनगढी, २९ सावन । फ्री मिडिया नेटवर्कके आयोजना तथा मानव अधिकार संचार प्रतिष्ठान नेपाल (इह्रिकन)के आर्थिक सहयोगमे विफेक रोज धनगढीमे पत्रकारके भौतिक तथा पेशागत सुरक्षाबारे सरोकारवाला निकायविच अन्तरक्रिया तथा छलफल कार्यक्रम हुइल बा ।
नेपाल पत्रकार महासंघके केन्द्रीय सचिव हेमकर्ण विकके वडका पहुनामे हुइल कार्यक्रममे उहाँ संचारकर्मीहुक्रे पत्रकार आंचारसहिताभिटर रहिके काम करे पर्ना जोड डेहल रहिट । ‘जब आंचारसहिताके उल्लंघन हुइठ, तब थ्रेटके घटना बह्रठ,’ उहाँ कहलै–सत्यतथ्यमे आधारित सन्तुलित समाचार लिखलेसे केल संचारकर्मी सुरक्षित रहे सेक्की ।’
नेपाल पत्रकार महासंघके पूर्व केन्द्रीय सदस्य कर्ण शाह मुलुकमे अस्थिरता बह्रल बेला पत्रकार जोखिममे पर्ना बटैलै । पछिल्का समयमे अधिकारके आन्दोलन हुईबेर संचारकर्मी ओ मिडिया उप्पर आक्रमणके घटनाफे हुइल उहाँ बटैलै ।
जिल्ला प्रहरी कार्यालय कैलालीके प्रहरी प्रमुख विश्व अधिकारी प्रहरी मानव अधिकारके क्षेत्र सदैव सहयोग कैना तयार रहल बटैलै । ‘प्रहरीफे संचारकर्मी जस्टे आम नागरिकहे सेवा प्रदान कैना इकाई हो,’ उहाँ कहलै–‘कहु घटना हुइलेसे प्रहरी उहाँ पुगके सेवा डेनामे कौनो कमी नइकरले हो ।’
जिल्ला प्रशासन कार्यालय कैलालीके प्रशासकीय अधिकृत शिवराज जोशी स्थानीय संचारमाध्यमहुकनके नकारात्मक समाचार केल नाही, सकारात्मक समाचार लिखडेना आग्रह करलै । धनगढी उपमहानगरपालिका वडा नम्बर ८ के अध्यक्ष नारायण बराल नगरपालिका संचारकर्मीके क्षमता अभिबृद्धिके लाग सहयोग कैना तयार रहल बटैलै ।
नेपाल वार एशोसियसन कैलालीके सचिव प्रेमबहादुर शाही संचारकर्मी आंचारसहितामे नइबैठके चुनौती आइल बटैलै । पत्रकार भोजराज जोशी संचारकर्मी उप्पर धम्की ओ आक्रमणके घटना बह्रल कहटी भौतिक तथा पेशागत सुरक्षामे सरोकारवाला निकायमे ध्यान जाई पर्ना जरुरी रहल बटैलै ।
नेपाल पत्रकार महासंघ कैलालीके निवर्तमान अध्यक्ष जगत साउद सुदूरपश्चिम प्रदेशमे संचारकर्मी उप्पर धम्की, कुटपिटके घटना बह्रल मने दोषीहे कार्वाही नइहुइल बटैलै । उहाँ कहलै, पहिले मधेश ओरके पत्रकारहुकनहे थ्रेट ओ कुटपिट होए अब्बे सुदूरपश्चिमके टमान संचारमाध्यम तथा संचारकर्मीन उप्पर आक्रमण हुइटी बा ।
राष्ट्रिय मानव अधिकार आयोगके अधिकृत रुपाश्री निरौला राष्ट्रिय मानव अधिकार आयोग एकदम मानव रक्षकहुके काम करटी रहल बटैली ।
नेपाल पत्रकार महासंघ कैलालीके अध्यक्ष हिमालय जोशी कोभिडसे संचारक्षेत्रमे पारल असर ओ यी क्षेत्रसंग जोरल प्रमुख चुनौती तथा पैरबीके लाग पहिचान हुइल मुद्दाबारे जानकारी डेहल रहिट ।
कैलालीमे २२ ठो पत्रिका, १० ठो साप्ताहिक पत्रिका, २७ ठो एफएम, २ ठो टिभी ओ दर्जनसे अनलाईन रहलमे कोभिडके कारण यहाँके संचारमाध्यम तथा संचारकर्मीमे असर परल उहाँ बटैलै ।
मानव अधिकार संचार प्रतिष्ठान नेपाल (इह्रिकन)के निराजन नेपाली कार्यक्रमके उद्देश्य तथा पहिचान हुइल मुद्दाके विशिष्टीकरण करटी कार्ययोजनाके खाका उप्पर छलफल करैले रहिट ।
कार्यक्रमके संचालन नेपाल पत्रकार महासंघ कैलाली सचिव प्रेम चौधरी ओ स्वागत कोषाध्यक्ष लक्ष्मी प्रसाद जैशी करले रहिट
