नाका व्यवस्थापन प्रदेशके जिम्मा हो ः नगर प्रमख वड

पहुरा समाचारदाता
धनगढी,३० सावन । धनगढी उमहानगरपालिकाके नगर प्रमुख नृप बहादुर वड नाकाके व्यवस्थापन कैना सक्कु जिम्मा प्रदेश सरकारके रहल बटैले बटै ।

मानव अधिकार शिक्षा तथा न्यायमा पहुँच केन्द्र (एड–जस) नेपालके आयोजना तथा नेपाल इस्टिच्युट अफ पिस काठमाण्डौके सहकार्यमे शुकके रोज धनगढीमे हुइल सीमा पार काम कैना प्रवासी नेपाली कामदारहुकनके हकहित संरक्षण सम्बन्धी पालिका स्तरीय संवाद कार्यक्रममे नगर प्रमुख वड उ बाट बत्वाइल रहिट ।

उहाँ कहलै, सीमा व्यवस्थापन, प्रवासी नेपालीके आवात जावत सक्कु तथ्याङक ढरना प्रदेश सरकारके जिम्मेबारी हो, हमार साझेदारी ओ सहकार्य हुई सेकी । धनगढी उपमहानगरपालिका बोडर लग्गे रहल कारण ८८ ठो पालिकासे बाहेर जैना प्रवासीके तथ्याङक ढारे नइसेक्जाई ओकर तथ्याङक ढरना जिम्मेबारी सम्बन्धित पालिकाके फे हो नगर प्रमुख वडा कहलै । मने सीमामे प्रवासी नेपाली डाडुभैयासे पाइल दुःखके बारेमे प्रदेश सरकारसे छलफल करे सेक्जाई ।
नेपाल राष्ट्रिय दलित समाज कल्याण संघके अध्यक्ष चक्र विक पुर्खासे करल श्रममे बाँचे नइसेक्के यहाँके यूवा विदेश पलायन हुइल बटैलै । नेपाली युवा भारतमे ढेर दुःख भोगे परल मने उहाँक सिखल सीप नेपालमे मान्यता नइडेहल बटैलै ।

यूवाके क्षेत्रमे काम करुइया प्रेम ढुङगना भारतमे जैना प्रावसी यूवाके तथ्याङक सरकारसे ढारे नइसेकल बटैलै । तथ्याङक नइधारल कारण ढेर जैसिन वेपत्ता हुइल उहाँ जनैलै । कार्यक्रममे धनगढी उपमहानगरपालिकाके सामाजिक विकास अधिकृत टंक विष्ट, धनगढी उपमहानगरपालिकाके कार्यपालिका सदस्य प्रेम विक, वडा सदस्य यकर लाग अलगे नीति बनाईमे जोड डेहल रहिट । कार्यक्रमके सहजीकरण नेपाल इस्टिच्युट अफ पिस काठमाण्डौके कार्यक्रम संयोजक सुजित कुमार सक्सेना करले रहिट ।