गुरहीसंगे बरघर चोक नामाकरण

पहुरा समाचारदाता
राजापुर, ३० सावन । राजापुर नगरपालिकावडा नं. २ जोतपुर गाउँो बरघर चोकमे थारु समुदायसे गुरही कार्यक्रम करले बटै । थारु समुदायसे मनैटी आइल यी पर्व कतिपय गाउँमे गुरहीके नाउँमे मिठ खैना केल करलमे यी बरस विधिपुर्वक बरघर चोक नामाकरण करटी गुरही मनाइल हो ।

थारु समुदायके अपने सँस्कृति ओ पहिचान बा । बरघर प्रणालीहे स्थापित करेक लाग साथे थारुहुक्रे गाउँ सञ्चालन तथा व्यवस्थापन कैना मुख्य जिम्मेवार बरघर रहना हुइल ओरसे बरघरके नाउँसे उ चोकके नाउँफे गुरहीके दिन बरघर चोक कहिके नामाकरण करल अधिकारकर्मी सोम डेमनडौरा बटैलै ।

थारु समुदायमे कहु गुरिया टे कहु गुरहीके नाउँसे यी पर्व मनैना करजाइठ । बालबालिकाके मुख्य सहभागीता रहना हुइल ओरसे यी पर्वहे बालपर्वके रुपमे फे लेना करल बा ।
गुरही, गुर्ही (दाङ्ग मुल रहल ओरसे झिङ्गौरा कहना करल)– एक मेरिक किरा जिहीहे अंग्रेजीमे ड्य्रागन फ्लाई कहठै । गुरिया, गुर्या– हिन्दी भाषामे गुडीया तथा अंग्रजीमे मन्नेक्विन कहिजाइठ । यी पर्व सावन शुक्लपक्ष, नागपञ्चमीके दिनमे मनैना करजाइठ ।

गुरही÷गुरियाके दिन गाउँके चोक (पहिले पहिले गुवाँके छेउमे या झाडीके लग्गे) साँझके महिला तथा लउण्डी गुरिया (गुर्ही) फेक्ना ओ पुरुष तथा लउण्डा उहीहे स्वाँटा या लठ्ठीसे पिट्न करठै ।पिट सेकलपाछे घुघरी (मटरा, केराउ, चना या चाउरके भुजा), बरिया, रोटी, खुर्मा खैना करठै । ओकरपाछे अस्राई जैनाफे करजाइठ ।

गुरही मच्छर ओ किरनहे खैना दुष्ट आत्मा नाशकके रुपमे लेना करजाइठ । गरही बनाके पिटलेसे दुःख, कष्ट तथा विमारी ओ बालीनालीमे हुइना प्रकोप समेत नाश हुइना कना जनविश्वास रहल बा । यी पर्व डिडीभैयाबीचके प्रगाढ सम्बन्धो पर्वके रुपमे ओ सद्भावो पर्वके रुपमे समेट लेना करजाइठ ।
युवा समाजसेवी सिताराम थारु कहठै काठमाडौंमे नोकरीके लाग ओ पह्रे गैल थारुहुक्रे यी पर्वके आयोजना करठै । मने थारु गाउँमे भर पर्वके नाउँमे शिकार भात केल खैना चलन बा । टबमारे थारु समुदायके सँस्कृति गाउँस्तरसे मनैना परम्परा स्थापित कैना गाउँके बीच भागमे पर्ना बरघर चोकमे मनाइल हो ।

जोतपुर गाउँके बरघर बीरेन्द्र दहित युवाहुकनके बौद्धिक सोंचसे गुरिया पर्व पहिल चो यैसिक भव्य बनाइलमे खुसि व्यक्त करटी धन्यवाद डेहल रहिट । कार्यक्रमके व्यववस्थापन जोतपुर बरघर समितिसे करल रहे कलेसे सञ्चालन बरघर समितिके सचिब पुर्ण बहादुर थारु करल रहिट ।