द्धन्दपीडितहे आर्थिक शशक्तिकरण तालिम

पहुरा समाचारदाता
हसुलिया, ३२ सावन । महिला कानुन र बिकास मंचके आयोजनामे इण्टरनेशनल अलर्ट ओ टि.पि.ओ. नेपालके सहकार्यमे कैलारीमे आर्थिक शशक्तिकरण सम्बन्धि तालिम सम्पन्न हुइल बा ।
कैलारी गाउँपालिका वडा नम्बर ५ मे टि.जे जिल्ला संजाल मार्फत गाउपालिकाके १० बिपन्न तथा सिमान्तकृत द्धन्द पिडित परिवारके महिलाहुकनके लाग परिवार केन्द्रित अवधारणा अन्तर्गत सामाजिक तथा लैगिक शशक्तिकरण सम्बन्धी १० हप्ताके ओ आर्थिक शशक्तिकरण सम्बन्धी ५ हप्ताके करके १५ हप्ते तालिम सम्पन्न हुइल बा ।

समापन कार्यक्रममे महिला कानुन बिकास मंचके कार्यक्रम संयोजक अधिवक्ता दिपेश श्रेष्ठ यी तालिमसे द्धन्द प्रभावितमे आर्थिक आय आर्जनमे सहयोग कैना ओ कुछ करे सेक्ना क्षमताके बिकास करे बटैले रहिट ।

ओस्टेक करके कार्यकारी निर्देशक अधिवक्ता सविन श्रेष्ठ कार्यक्रमके उदेश्यके बारेमे प्रकाश परटी द्धन्दपीडित महिलाहुकनके सम्मानपूर्वक जीवन यापनके साथे द्धन्दपीडित परिवारके महिलाहे व्यवसायिक हुइना सहयोग पुगैना उदेश्यसे तालिमके आयोजना करल बटैलै ।

द्धन्दपीडित महिलाहुकनके सम्मानपूर्वक जीवनयापनके लाग पेशामे सहयोग कैना वा नयाँ पेशा करुइयाके लाग पहिल चरणमे २५ हजारके सामग्री उपलब्ध हुइना जानकारी करैटी यम्ने परिवारके सदस्यके साथे सहयोगफे ओटरे रहल बटैलै । समापन कार्यक्रमपाछे स्थानीय निकायके सरोकारसंग द्धन्दपीडितहुकनके आवश्यकता सम्बोधन कैना स्थानीय सरोकारवालाहुकनके भूमिका बिषयके बारेमे संवाद कार्यक्रम हुइल रहे ।

कार्यक्रममे वडा अध्यक्ष विष्णु प्रसाद चौधरीसे पुगाइल अतुलनिय सहयोगके लाग महिला कानुन ओ बिकास मंचके सविन श्रेष्ठसे प्रशंसापत्र प्रदान करल रहे । वडा अध्यक्ष चौधरी यी तालिमसे कुछ हदसमफे शशक्तिकरण करटी आधारभूत आवश्यकता परिपूर्ति कैना ओ व्यवसायिकमुखी बनैना जमर्को कैगिल ओ यि बहुट सराहनिय कार्य रहल बटैलै ।

टि.जे जिल्ला संजालके सदस्य लहिया देवी चौधरीके अध्यक्षतामे हुइल समापन कार्यक्रममे संचालन महिला कानून र बिकास मन्च, जिल्ला संयोजक रेणु प्रधान श्रेष्ठ करले रहिट । कार्यक्रममे तालिमके सहभागीहुकनहे प्रमाणपत्र प्रदान करल बा । कार्यक्रममे महिला तथा बालबालिका शाखाके बाल कुमारी चौधरी ,हसुलिया प्रहरी चौकीके प्रमुख, स्वास्थ चौकी प्रमुखके उपस्थिती रहल रहे ।