दिगो विकास लक्ष्य स्थानीयकरण सम्बन्धी अन्तरक्रिया कार्यक्रम

पहुरा समाचारदाता
बर्दिया, ४ भदौ । धनगढी उपमहानगरपालिकामे हुइटी रहल दिगो विकास लक्ष्य स्थानीकरण प्रयासके समिक्षा ओ भाव रणनीति सम्बन्धमे दुई दिने अन्तरक्रिया÷कार्यशाला कार्यक्रम शुकके रोजसे बर्दियामे सुरु हुइल बा ।

जिआइजेड सुशासनका लागि क्षमता विकास कार्यक्रम (सिडिएमजी) के प्राविधिक सहयोग तथा धनगढी उपमहानगरपालिकाके आयोजनामे हुइटी रहल उदघाटन कार्यक्रम धनगढी उपमहानगरपालिकाके नगर उपप्रमुख नृप बहादुर वडके अध्यक्षतामे हुइल हो । उदघाटन कार्यक्रममे बोल्टी नगरप्रमुख वड कोभिड विषयमे होए या और विषयमे होए, जिआइजेड हम्रहिन प्रथामिताके धारके सहयोग करल बटैलै ।

उहाँ कहलै –‘चार बर्षमे हम्रे का करली ओ आब का करे परी, जिआइजेडसे डेहल अवसरहे क्याच कैके ढेर चिज करली की नइकरली आब चाही करल चिजहे अभिलेखीकरण करटी सक्कु संघसंस्थासे कैना काम एकिकृत करके जाई परल । यहाँ लागु हुइल साझेदार संस्थासे कैना काम एकिकृत हुइना जरुरी बा ।,

हम्रे देशके ५८ औ नगरपालिकाभिटर परठी, सुदूरपश्चिममे उपमहानगरपालिका हुइल ओरसे हम्रे जौन मजा सिकाई सिखली, जौन हम्रे मजा ट्रेन नन्ली सक्कुहुनके लाग शिक्षाके विषय बनठ नगर प्रमुख वड कहलै ।

एकिकृत नइहुइल कारण संस्था अनुसार ३० ठो प्रोफाइल बनाई परल बा नगर प्रमुख कहलै, आज एसडिसी अनुसार करले बटी मने ओकर पोइन्टमे छुले बटी की नाइ आब तथ्याङक निकरली आघे बह्रे पर्ना जरुरी बिल्गाइठ ।

जिआइजेडके कोडनेटर यादव ओझा कार्यक्रमके उदेश्यबारे जानकारी डेहल रहिट । देशभर एसडिजीके गाइड लाइन बनाके लक्ष्य अनुसार आघे बह्रटी रहल ओ पन्धौ राष्ट्रिय विकास योजनासे यकर अवलम्बन करल उहाँ बटैलै ।

सन २०१६ से २०३० सम दिगो विकास लक्ष्यके उपलब्धी पुरा कैना लक्ष्य लेहल बा, उहाँ धनगढी उपमहानगरपालिका एसडिजीके इन्डिकेटर अनुसार बजेट छुटयाके काम करटी रहल बटैलै । और नगरपालिकामे ओसिन नइडेखल हो । धनगढी उपमहानगरपालिका एसडिजीके इन्डिकेटरहे स्थानीयकरण कैनामे आघे बा ।

ओस्टेक उदघाटनपाछे सहजकर्ता अरुण रेग्मी दिगो विकास लक्ष्य अवधारण, परिमाणत्मक गन्तव्य ओ सुचक तथा स्थानीयकरणके अवश्यकता सम्बन्धमे कार्ड,चार्ट पेपर, प्रश्नोत्तर, अवस्था झल्कना भिडियो क्लिप ओ तस्बीर प्रस्तुती ओ छलफल करैले बटै ।

समुहगत अभ्यासमे दिगो विकास लक्ष्यके इन्डिकेटरमे उपमहानगरपालिकासे प्रोफाइलके आधारमे करटी कार्यक्रममे ५ विषयगत क्षेत्र आर्थिक विकास, सामाजिक विकास, पूर्वाधार विकास, बन वातावरण तथा विपद व्यवस्थापन, ओ संस्थागत विकास सेवा प्रवाह तथा सुशासनके समुह बनाके उ विचमे समुह छलफल ओ अभ्याससहिट निष्कर्ष करटी प्रस्तुती करल रहे ।

चालु आर्थिक बर्षके स्विकृत योजना, कार्यक्रम उपलब्ध खाकामे समयोजना कैनाके साथै समुहगत प्रस्तुती ओ छलफल करल रहे । साथे दिगो विकास लक्ष्यमे पुगक लाग एक महिना समय ठप करके एसडिजीके इन्डिकेटरमे हुइल उपलब्धीके तथ्याङ तयार पर्ना समयफे डेहल बा, ओकर उपलब्धी असोज दुसरा साता धनगढीमे हुइना दुसरा कार्यक्रममे प्रस्तुत करे पर्ना कहल बा ।
ओस्टेक प्रत्येक विषयगत समुहसे अपन क्षेत्रभिटरके दिगो विकास लक्ष्यके एक इन्डिकेटरमे स्वविश्लेषण, सहायक सरोकारपक्षके नक्साङकन ओ प्रस्तुतीकरण करल रहे ।

दुई दिने अन्तरक्रिया तथा समिक्षा कार्यशाला कार्यक्रममे धनगढी उपमहानगरपालिकाके टमान विषयगत शाखाके प्रमुख, वडा अध्यक्ष पाँच ठो विषयगत समितिके प्रतिनिधि, नगरसभाके सदस्य, कार्यपालिकाके सदस्य, जिआइजेड (सिडिएसमजी)के कोडनेटर, प्रादेशिक कोडटर नागरिक क्षेत्र, निजि क्षेत्रके प्रतिनिधिहुकनके उपस्थिति रहल रहे ।
शुक ओ शनिच्चरके रोज चल्ना कार्यक्रमके संचालन धनगढी उपमहानगरपालिकाके प्राद विकास शाखाके प्रमुख दिजराज भट्ट करले रहिट ।